‘ఖలేజా’ నటుడిపై అమెరికాలో గొడ్డలితో దాడి.. వీడియో వైరల్

సూపర్ స్టార్ మహేష్ బాబు (Mahesh Babu), మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో వచ్చిన ‘ఖలేజా’ (Khaleja) మూవీలో నటించిన పంజాబీ నటుడు అమన్ ధాలివాల్‌పై (Aman Dhaliwal) అమెరికాలో దాడి జరిగింది. ఆయన జిమ్‌లో కసరత్తులు చేస్తుండగా ఓ వ్యక్తి గొడ్డలితో దాడి చేశాడు. ఈ క్రమంలో ఆ వ్యక్తిని అమన్ నిలువరించగా జిమ్ సిబ్బంది అతడిని బంధించి పోలీసులకు అప్పగించారు. దుండగుడి దాడిలో అమన్ శరీరంపై బలమైన గాయాలయ్యాయి. అమన్‌ను జిమ్ సిబ్బంది హాస్పిటల్‌లో చేర్చారు.

స్థానిక మీడియా కథనాల ప్రకారం, కాలిఫోర్నియాలోని గ్రాండ్ ఓక్స్‌లో ఉన్న ప్లానెట్ ఫిట్‌నెస్ అనే జిమ్‌‌లో అమన్‌పై దాడి జరిగింది. ఉదయం 9.20 గంటల సమయంలో ఈ దాడి జరిగినట్టు సమాచారం. ప్రస్తుతం పోలీసులు కేసును దర్యాప్తు చేస్తున్నారు. నిందితుడిని శాంటా అనకు చెందిన 30 ఏళ్ల రోనాల్డ్ చంద్‌గా పోలీసులు గుర్తించారు. అమన్‌పై జిమ్‌లో జరిగిన దాడి వీడియో ప్రస్తుతం సోషల్ మీడియాలో వైరల్‌గా మారింది. ఆయన గాయాలతో ఉన్న ఫొటోలు సైతం వైరల్ అవుతున్నాయి. ఆయన త్వరగా కోలుకోవాలని పలువురు ట్విట్టర్ ద్వారా కోరుకుంటున్నారు.

అమన్ ధాలివాల్ ఎక్కువగా పంజాబీ సినిమాల్లో నటించారు. అలాగే, బాలీవుడ్ మూవీస్ ‘జోధా అక్బర్’, ‘బిగ్ బ్రదర్’‌లో కూడా కనిపించారు. ఇక తెలుగులో ‘ఖలేజా’ సినిమాలో జాన్ అనే పాత్రలో అమన్ నటించారు. సినిమాల్లో మాత్రమే కాకుండా ‘ఇష్క్ కా రంగ్ సఫేద్’, ‘పోరస్ అండ్ విఘ్నహార్త్ గణేష్’ వంటి టీవీ షోలలోనూ మెరిశారు.

పంజాబ్‌కు చెందిన రాజకీయ నాయకులు మిథు సింగ్ ఖరేకే, గుర్‌తేజ్ కౌర్ ధాలివాల్ దంపతుల కుమారుడు అమన్. ఈయన చిన్నతనం అంతా మాన్సాలో గడిచింది. ఢిల్లీలోని ఓ మెడికల్ కాలేజీలో బ్యాచిలర్ ఇన్ రేడియాలజీ, మాస్టర్స్ ఇన్ హాస్పిటల్ అడ్మినిస్ట్రేషన్ పూర్తిచేసినట్టు సమాచారం. ప్రస్తుతం హాలీవుడ్ సినిమాల్లో నటిస్తోన్న అమన్.. కాలిఫోర్నియాలోనే ఉంటున్నారు.

2023-03-17T10:12:41Z dg43tfdfdgfd