‘ఛోటా భీమ్’ క్రియేటర్‌తో ‘అల్లరి’ నరేష్ 61వ సినిమా.. ఘనంగా ప్రారంభోత్సవం
ఈ తరం హీరోల్లో కింగ్ ఆఫ్ కామెడీగా పేరుతెచ్చుకున్న నటుడు ‘అల్లరి’ నరేష్ (Allari Naresh). అయితే, ఈ మధ్యకాలంలో ఆయన చేస్తున్న సినిమాలన్నీ కామెడీ ఎంటర్‌టైనర్లకు దూరంగా వైవిధ్యంగా ఉంటున్నాయి. తాను కామెడీతో పాటు ఇంటెన్స్ రోల్స్ కూడా చేయగలనని ఇప్పటికే నిరూపించుకున్న నరేష్.. ‘నాంది’, ‘ఇట్లు మారేడుమిల్లి ప్రజానీకం’ సినిమాలతో ఎలాంటి పాత్రనైనా చేయగలనని చాటిచెప్పారు. ఆయన సీరియస్ రోల్‌లో నటించిన ‘ఉగ్రం’ సినిమా త్వరలోనే ప్రేక్షకుల ముందుకు రానుంది.
వరుసగా సీరియస్ మూవీస్ చేసుకుంటూ వెళ్తోన్న నరేష్.. తన నుంచి కామెడీని ఆశించే అభిమానులకు గుడ్ న్యూస్ చెప్పారు. ఉగాది రోజున తన 61వ సినిమాను ప్రారంభించారు. ఫుల్ లెంగ్త్ ఫ్యామిలీ ఎంటర్‌టైనర్‌గా రూపొందనున్న ఈ సినిమా ద్వారా మల్లి అంకం దర్శకుడిగా పరిచయం అవుతున్నారు. చిలక ప్రొడక్షన్స్ బ్యానర్‌పై రాజీవ్ చిలక ఈ సినిమాను నిర్మిస్తున్నారు.
ఈ సినిమాలో అల్లరి నరేష్ సరసన హీరోయిన్‌గా ‘జాతిరత్నాలు’ ఫేమ్ ఫరియా అబ్దుల్లా నటిస్తున్నారు. అల్లరి నరేష్, ఫరియా జంటగా నటిస్తుండటం ఇదే తొలిసారి. ఈ సినిమా కంప్లీట్ ఫ్యామిలీ ఎంటర్‌టైనర్ అని మాత్రమే నరేష్ ఒప్పుకోలేదట.. ఈ కథలో ఒక యూనిక్ పాయింట్ ఉందట, అదే నరేష్‌ను ఆకర్షించిందని చిత్ర యూనిట్ చెబుతోంది. కాబట్టి అల్లరి నరేష్ నుంచి మరో హిలేరియస్ రైడ్‌కు సిద్ధంగా ఉండమని మేకర్స్ చెబుతున్నారు.
ఉగాది రోజున నరేష్ 61వ సినిమాను ప్రకటించిన నిర్మాత.. ఈరోజే ఘనంగా చిత్ర ప్రారంభోత్సవాన్ని నిర్వహించారు. ఈ ప్రారంభోత్సవ కార్యక్రమానికి ప్రముఖ నిర్మాత డి.సురేష్ బాబు ముఖ్య అతిథిగా విచ్చేసి హీరోహీరోయిన్లపై ముహూర్తపు సన్నివేశానికి క్లాప్ ఇచ్చారు. ఇంకా ఈ ప్రారంభోత్సవ కార్యక్రమంలో నిర్మాత శరద్ మరార్, దర్శకులు నాగ్ అశ్విన్, తరుణ్ భాస్కర్ పాల్గొన్నారు.
అబ్బూరి రవి డైలాగులు రాసిన ఈ సినిమాకు గోపీ సుందర్ సంగీతం సమకూరుస్తున్నారు. సూర్య కెమెరామేన్. చోటా కె ప్రసాద్ ఎడిటర్. భరత్ లక్ష్మీపతి, సురేష్ లద్దునూరి సహ నిర్మాతలు. ఆర్ట్ డైరెక్టర్‌గా జేకే మూర్తి పనిచేస్తున్నారు. ‘ఛోటా భీమ్’ క్రియేటర్ అయిన రాజీవ్ చిలక.. 20 ఏళ్లకు పైగా యానిమేషన్ అండ్ మీడియా ఇండస్ట్రీలో ఓ వెలుగు వెలిగారు. ఇప్పుడు చిలక ప్రొడక్షన్స్ అనే నిర్మాణ సంస్థను స్థాపించి సినిమా నిర్మాణంలోకి అడుగుపెట్టారు. ఈ బ్యానర్‌లో వస్తోన్న రెండో సినిమా ఇది. త్వరలోనే షూటింగ్ ప్రారంభమవుతుంది.
మరోవైపు, నరేష్ హీరోగా నటించిన ‘ఉగ్రం’ సినిమా విడుదలకు సిద్ధమవుతోంది. ‘నాంది’ తరవాత అల్లరి నరేష్, దర్శకుడు విజయ్ కనకమేడల క్రేజీ కాంబినేషన్‌లో వస్తున్న రెండో చిత్రమిది. షైన్ స్క్రీన్స్ బ్యానర్‌పై సాహు గారపాటి, హరీష్ పెద్ది నిర్మిస్తున్నారు. సమ్మర్‌లో సినిమా విడుదలకు సన్నాహాలు చేస్తున్న మేకర్స్ ఇటీవల టీజర్‌ విడుదల చేశారు. ఈ టీజర్‌కు ప్రేక్షకుల నుంచి మంచి స్పందన వచ్చింది.
2023-03-22T10:45:43Z dg43tfdfdgfd