RYTHU BHAROSA : 5 ఎకరాలా? లేదా 10 ఎకరాలా?.. రైతు భరోసాపై అభిప్రాయ సేకరణ ప్రారంభం..

తెలంగాణ అసెంబ్లీ ఎన్నికల సందర్భంగా కాంగ్రెస్ ఇచ్చిన ముఖ్యమైన హామీల్లో రైతు భరోసా కూడా ఒకటి. తాము అధికారంలోకి వస్తే ఏటా ఎకరానికి రూ. 15 వేలు సాయం అందిస్తామని హామీ ఇచ్చింది. గత ప్రభుత్వం రైతు బంధు పేరుతో ఇచ్చిన స్కీమ్ పేరును మార్చింది. అయితే ఈ పథకాన్ని అసలైన అర్హులకు మాత్రమే వర్తింపజేయాలని తెలంగాణ ప్రభుత్వం నిర్ణయించింది. పంట సాగు చేసే రైతులకు పెట్టుబడి సాయం అందిస్తామని చెప్పింది. గత ప్రభుత్వం మాదిరిగా వ్యవసాయేతర భూములకు కూడా సాయం ఇవ్వబోమని స్పష్టం చేసింది. 5 లేదా 10 ఎకరాల భూమికే సాయాన్ని అందించేలా పరిమితి విధించే విషయాన్ని పరిశీలిస్తోంది.

ఈ నేపథ్యంలోనే పథకానికి విధివిధానాలు రూపొందించేందుకు అభిప్రాయ సేకరణ చేపట్టాలని ప్రభుత్వం నిర్ణయం తీసుకుంది. ఈరోజు (జూలై 10) నుంచే వర్క్ షాపులను ప్రారంభించింది. ఉమ్మడి జిల్లాల కేంద్రాల్లో రైతులు, రైతు సంఘాల నుంచి స్వయంగా అభిప్రాయాలు తీసుకోనుంది. మొదటగా ఖమ్మం జిల్లా నుంచి ఈ కార్యక్రమానికి మంత్రివర్గ ఉపసంఘం ఇవాళ శ్రీకారం చుట్టింది. ఉప ముఖ్యమంత్రి భట్టి విక్రమార్క నేతృత్వంలోని ఈ ఉపసంఘంలో తుమ్మల నాగేశ్వర రావు, పొంగులేటి శ్రీనివాస్ రెడ్డి, శ్రీధర్ బాబు సభ్యులుగా ఉన్నారు. వీరితో పాటు ఖమ్మం జిల్లా ఇన్ ఛార్జ్ మంత్రి కోమటిరెడ్డి వెంకట్ రెడ్డి కూడా ఈరోజు కలెక్టరేట్ లో నిర్వహిస్తున్న సమావేశానికి హాజరయ్యారు.

ఖమ్మం కలెక్టరేట్ లో జరిగే వర్క్ షాప్ లో రైతులు, రైతు సంఘాలు ప్రతినిధులు, వ్యవసాయ శాఖ అధికారులు పాల్గొంటారు. రైతు భరోసా పథకానికి విధివిధానాలపై అభిప్రాయాలు సేకరిస్తారు. ఈ అభిప్రాయ సేకరణ కార్యక్రమం హైదరాబాద్ మినహా అన్ని ఉమ్మడి జిల్లాలో జరగనుంది. ఏయే తేదీల్లో ఏ జిల్లాలో కార్యక్రమం ఉందో ఇప్పుడు చూద్దాం.

  • జూలై 10 - ఖమ్మం

  • జూలై 11 - ఆదిలాబాద్

  • జూలై 12 - మహబూబ్ నగర్

  • జూలై 15 - వరంగల్

  • జూలై 16 - మెదక్

  • జూలై 18 - నిజామాబాద్

  • జూలై 19 - కరీంనగర్

  • జూలై 22 - నల్లగొండ

  • జూలై 23 - రంగారెడ్డి

అన్ని జిల్లాల నుంచి అభిప్రాయ సేకరణ పూర్తి చేసిన తర్వాత మంత్రివర్గ ఉపసంఘం రైతు భరోసా విధివిధానాలపై నివేదిక రూపొందించి ముఖ్యమంత్రికి అందజేయనుంది. అనంతరం ఈ స్కీమ్ కు సంబంధించిన మార్గదర్శకాలను ప్రభుత్వం విడుదల చేయనుంది.

కాగా రైతు భరోసా సాయాన్ని పంట సాగు చేసే రైతులకు మాత్రమే అందించాలనేది సీఎం రేవంత్ రెడ్డి ఉద్దేశమని వ్యవసాయ శాఖ మంత్రి తుమ్మల నాగేశ్వర రావు తెలిపారు. గత బీఆర్ఎస్ ప్రభుత్వం వ్యవసాయ యోగ్యం కాని భూములకు కూడా రైతుబంధు సాయాన్ని అందించిందని గుర్తు చేశారు. దీని ద్వారా దాదాపు రూ. 25 వేల కోట్లు దుర్వినియోగం అయ్యాయని పేర్కొన్నారు. కౌలు రైతులకు కూడా రైతు భరోసాను వర్తింప చేస్తామని, అయితే భూమి యజమానులు, కౌలు రైతులు ముందుగా దీనిపై చర్చించుకోవాలన్నారు. అలాగే రుణమాఫీ పూర్తయిన తర్వాతే రైతు భరోసా సాయాన్ని విడుదల చేస్తామని మంత్రి స్పష్టం చేశారు. ఆగస్టు 15 నాటికి రూ. 2 లక్షల రుణమాపీ పూర్తి చేయాలని ప్రభుత్వం లక్ష్యంగా పెట్టుకుంది. దీని తర్వాతే రైతు భరోసా సాయం విడుదల కానుంది. అంటే ఇంకా నెల రోజుల తర్వాతే దీనిపై స్పష్టత రానుంది.

2024-07-10T08:39:02Z dg43tfdfdgfd