ఆల్ఇన్ మదన్
చరిత్ర, సైన్స్, పాలిటిక్స్, ఫిలాసఫీ, కరెంట్ అఫైర్స్... ఒక్కటేమిటి అన్ని టాపిక్లకు కేరాఫ్ మదన్ గౌరి యూట్యూబ్ ఛానెల్. వాస్తవానికి ఈ తరంవాళ్లకు ఇలాంటి సబ్జెక్ట్స్ పెద్దగా నచ్చవు. కానీ.. మదన్ చెప్పే స్టైల్ నచ్చి చాలామంది ఈ వీడియోలు చూస్తున్నారు. అందుకే మదన్ తమిళనాడులో సెలబ్రిటీ అయిపోయాడు. ప్రాంతీయ భాషలో వీడియోలు చేసినా ఇంతలా సక్సెస్ రావడానికి కారణం అతను పెట్టిన ఎఫర్ట్.
మదన్ గౌరి మే 28, 1993లో తమిళనాడులోని తూత్తుకుడిలో పుట్టాడు. మాతృభాష తమిళం. వీడియోలు కూడా అదే భాషలో చేస్తున్నాడు. స్కూల్ ఎడ్యుకేషన్ను అమరావతినగర్లోని సైనిక్ స్కూల్, మధురైలోని డాల్ఫిన్ పబ్లిక్ స్కూల్లో పూర్తి చేశాడు. తర్వాత డిగ్రీ చేయడానికి శ్రీవిల్లిపుత్తూరులోని కలశలింగం అకాడమీ ఆఫ్ రీసెర్చ్ అండ్ హయ్యర్ ఎడ్యుకేషన్లో చేరాడు. కోయంబత్తూరులోని అమృత విశ్వ విద్యాపీఠంలో ఎంబీఏ చదివాడు. మేనేజ్మెంట్ అండ్ బిజినెస్ అనలిటిక్స్ డిగ్రీ కోసం స్టేట్ యూనివర్శిటీ ఆఫ్ న్యూయార్క్కు వెళ్లాడు. తర్వాత కాగ్నిజెంట్, బాష్ ఇంజినీరింగ్తోపాటు కొన్ని కంపెనీల్లో పనిచేశాడు.
మదన్ చదువుకుంటున్నప్పుడు లాస్ట్ ఇయర్లో ఒక అమ్మాయిని ప్రేమించాడు. తర్వాత ఆమెతో విడిపోవాల్సి వచ్చింది. దాంతో డిప్రెషన్కు గురయ్యాడు. ఆ డిప్రెషన్ నుంచి బయటపడేందుకు యూట్యూబ్ వీడియోలు చూడటం మొదలుపెట్టాడు. తర్వాత యూట్యూబ్ ఛానెల్ పెట్టాడు. కాన్సంట్రేషన్ మొత్తం ఛానెల్ మీద పెట్టడంతో కొన్ని రోజులకు డిప్రెషన్ నుంచి బయటపడ్డాడు.
తనను తాను ఓదార్చుకోవడానికి 2013లో యూట్యూబ్ ఛానెల్ పెట్టాడు మదన్. మొదటి వీడియోను డిసెంబర్ 5, 2013న పోస్ట్ చేశాడు. కానీ.. వ్యూస్ పెద్దగా వచ్చేవి కావు. కానీ.. కొన్ని రోజులకు ఛానెల్కు వ్యూస్ రావడం మొదలైంది. మదన్ వీడియోల్లో కంటెంట్ సూటిగా, స్పష్టంగా ఉంటుంది. ఎంచుకున్న అంశాన్ని క్లుప్తంగా వివరిస్తాడు. అందుకే ఎక్కువమంది ఇష్టపడ్డారు. తక్కువ టైంలో సబ్స్క్రయిబర్స్ సంఖ్య పెరిగింది. అయితే.. ఎక్కువ రీచ్ ఉంటుందనే ఉద్దేశంతో మొదట్లో ఇంగ్లిష్లో వీడియోలు చేశాడు. కానీ.. తమిళంలో చాలా తక్కువ మంది క్రియేటర్లు ఇలాంటి వీడియోలు అప్లోడ్ చేస్తున్నారని తెలిసి మాతృభాషలోనే వీడియోలు చేశాడు.
యూట్యూబ్లో రెగ్యులర్గా వీడియోలు చేయడానికి ముందు ఒక ఐటీ కంపెనీలో అనలిస్ట్గా పనిచేశాడు. యూట్యూబ్ కోసం జాబ్ మానేసినప్పుడు అందరూ అతని అభిప్రాయాన్ని వ్యతిరేకించారు. కానీ, సక్సెస్ సాధించాడు. యూట్యూబ్ వీడియోలు చేయడంతో పాటు, ప్రముఖ క్రికెటర్ హర్భజన్ సింగ్ను ఇంటర్వ్యూ చేసి టెడ్ఎక్స్ టాక్ కూడా ఇచ్చాడు. 2019లో అతను తమిళ భాషలో అత్యధికంగా సంపాదించిన యూట్యూబ్ క్రియేటర్గా రికార్డ్ క్రియేట్ చేశాడు. ఈ మధ్యే న్యూస్ యాప్ కోక్రును మొదలుపెట్టాడు. ఇది మొదటి 48 గంటల్లో 2,00,000 డౌన్లోడ్లను దాటింది.
మొదట్లో సెల్ఫోన్లో వీడియోలు తీసేవాడు. ఇప్పటికీ వీడియోల్లో పెద్దగా ఎఫెక్ట్స్ ఉండవు. నేరుగా కెమెరా ముందుకు వచ్చి మాట్లాడి, వెళ్లిపోతాడు. అతని వీడియోలు చూస్తే ఒక ఫ్రెండ్తో మాట్లాడుతున్నట్టే అనిపిస్తుంది. వీడియోలకు పెద్దగా ఎడిటింగ్ కూడా అవసరం లేదు. అందుకే మొదటి నుంచి తన వీడియోలను తానే ఎడిట్ చేసుకున్నాడు. మదన్ వీడియోలకు అన్ని వయసుల వాళ్లు కనెక్ట్ అవుతారు. న్యూస్లో ఉన్న అంశాల మీదే ఎక్కువగా వీడియోలు చేస్తుంటాడు. టాపిక్ గురించి మాట్లాడే ముందు అతను చాలా రీసెర్చ్ చేస్తాడు. వీడియో కూడా మరీ పెద్దగా కాకుండా 15 నుండి 20 నిమిషాల నిడివితో అప్లోడ్ చేస్తాడు.
యూట్యూబ్లో మిలియన్ సబ్స్క్రయిబర్ మార్క్ను దాటిని మొదటి వ్యక్తిగత తమిళ యూట్యూబర్ మదన్ గౌరి. అంతేకాదు.. ప్రస్తుతం ‘మదన్ గౌరి’ ఛానెల్ను 6.72 మిలియన్ల మంది సబ్స్క్రయిబ్ చేసుకున్నారు. తమిళ భాష, సంస్కృతిపై వీడియోల సిరీస్ చేసినప్పుడు ఫాలోయింగ్ బాగా పెరిగింది. ఇన్స్టాగ్రామ్, ట్విట్టర్ లాంటి సోషల్ మీడియా ఫ్లాట్ఫామ్లలో కూడా యాక్టివ్గా ఉంటాడు. తన ఫ్యాన్స్తో ఇంటరాక్ట్ అవుతుంటాడు.
©️ VIL Media Pvt Ltd. 2023-05-28T05:44:50Z dg43tfdfdgfd