‘అతడు’ సినిమాలో నేనే నటించాల్సింది.. ‘దేశముదురు’ మిస్ చేసుకున్నా: హీరో వేణు
సూపర్ స్టార్ మహేష్ బాబు హీరోగా త్రివిక్రమ్ దర్శకత్వంలో వచ్చిన ‘అతడు’ సినిమాలో తాను నటించాల్సిందనని అన్నారు సీనియర్ హీరో వేణు తొట్టెంపూడి (Venu Thottempudi). అలాగే, ‘దేశముదురు’ సినిమా కూడా చేయలేకపోయానని అన్నారు. వేణు తొట్టెంపూడి, అవంతిక మిశ్రా ప్రధాన పాత్రల్లో నటించిన వెబ్ సిరీస్ ‘అతిథి’. ఈ వెబ్ సిరీస్‌ను రాండమ్ ఫ్రేమ్స్ ఎంటర్‌టైన్మెంట్ సంస్థ నిర్మించింది. భరత్ వైజీ దర్శకత్వం వహించారు. దర్శకుడు ప్రవీణ్ సత్తారు షో రన్నర్‌గా వ్యవహరించారు. డిస్నీ ప్లస్ హాట్‌స్టార్‌లో నేటి నుంచి ‘అతిథి’ వెబ్ సిరీస్ స్ట్రీమింగ్ అవుతోంది. ఈ సందర్భంగా వేణు మీడియా ముందుకు వచ్చారు. ‘అతిథి’ విశేషాలతో పాటు వ్యక్తిగత విషయాలు పంచుకున్నారు.
✦ ‘అతిథి’కి మంచి రెస్పాన్స్ వస్తోంది. కొందరు క్లాసీగా ఉందని, మరికొందరు మాస్ ఎలిమెంట్స్ ఉన్నాయని అంటున్నారు. నన్ను అడిగితే ఇదొక కంప్లీట్ ఫ్యామిలీ ఎంటర్‌టైనర్ మూవీ లాంటిది. ఇందులో కామెడీ, సస్పెన్స్, డ్రామా, సెంటిమెంట్ అన్నీ ఉన్నాయి. హారర్ ఎలిమెంట్స్ తక్కువ. అందుకే ఫ్యామిలీ అంతా కలిసి హాయిగా చూడొచ్చు. ఎలాంటి ఇబ్బంది ఉండదు.
✦ లాక్‌డౌన్ టైమ్‌లో వెబ్ సిరీస్‌లు చాలా చూశాను. ఆ టైమ్‌లో నేను కూడా ఒక వెబ్ సిరీస్ చేస్తే బాగుంటుంది అనిపించింది. నేను అనుకున్నట్లే ఈ వెబ్ సిరీస్ ఎగ్జిక్యూటివ్ ప్రొడ్యూసర్ ‘అతిథి’ గురించి చెప్పారు. ఆ తర్వాత స్క్రిప్ట్ నా దగ్గరకు పంపించారు. ‘అతిథి’ కథ నాకు బాగా నచ్చింది. భరత్ నా దగ్గరకు వచ్చినప్పుడు మీరు ఈ సబ్జెక్ట్ చేస్తే బాగుంటుంది అన్నాడు. నన్ను నమ్మి ఒక కొత్త డైరెక్టర్ వచ్చినప్పుడు ఎంకరేజ్ చేయాలని అనిపించింది. కథ కూడా బాగా ఇంప్రెస్ చేసింది. దాంతో ఈ వెబ్ సిరీస్ చేసేందుకు ఒప్పుకున్నా.
✦ నా కెరీర్‌లో ఫస్ట్ టైమ్ హారర్ కంటెంట్‌లో నటించాను. ఈ వెబ్ సిరీస్‌లో నేను చేసిన రవివర్మ పాత్ర కోసం చాలా కష్టపడ్డాను. ఎందుకంటే ఈ కథలో అతనికి అన్నీ తెలుసు. కానీ ఏమీ తెలియనట్లు ఉండాలి. ఎక్కువ, తక్కువ కాకుండా బ్యాలెన్స్‌గా ఉండాలి. మిగతా పాత్రలకు ఇలాంటి పరిమితులు లేవు. నాకు మాత్రం డబ్బాలో పెట్టినట్లు బిగించారు. దర్శకుడు భరత్ ఈ కథ నా దగ్గరకు తీసుకొచ్చినప్పుడు మీరు సెటిల్డ్ పర్ఫార్మెన్స్ చేయాలని చెప్పాడు. మా నటనకు మంచి పేరొస్తుందంటే ఆ క్రెడిట్ భరత్‌కే ఇవ్వాలి.
✦ ‘అతిథి’లో లిమిటెడ్ క్యారెక్టర్స్‌తో ఒక డ్రామా ప్లే అవుతుంటుంది. ప్రవీణ్ సత్తారు ప్రొడ్యూసర్ కాబట్టి ఆయన ప్రతి విషయంలో జాగ్రత్తలు తీసుకునేవారు. మాతో డిస్కస్ చేసేవారు. సెట్‌కు రాలేదు గానీ అన్నీ తెలుసుకునేవారు. ‘అతిథి’ కోసం ఆయన మంచి ఎఫర్ట్ పెట్టారు. ‘అతిథి’లో నటించడాన్ని పూర్తిగా ఎంజాయ్ చేశాను.
✦ సెకండ్ ఇన్నింగ్స్‌లో స్పీడ్‌గా సినిమాలు చేయాలనే కోరిక లేదు. మంచి సబ్జెక్ట్ చేయాలి.. నటుడిగా నా బెస్ట్ ఇవ్వాలని అనుకుంటున్నా. ఎందుకంటే నటుడిగా నా బెస్ట్ పర్ఫార్మెన్స్ చేసే కథ ఇంకా దొరకలేదు. నాగార్జున ‘అన్నమయ్య’, చిరంజీవి చేసిన కొన్ని సినిమాలు చూసినప్పుడు ఇలాంటి సబ్జెక్ట్ మనం తప్పకుండా చేయాలని అనిపిస్తుంటుంది. ‘అతడు’ సినిమాలో సోనూ సూద్ క్యారెక్టర్‌లో నేనే నటించాలి. అయితే కొన్ని కారణాల వల్ల ఆ ప్రాజెక్ట్ చేయలేకపోయాను. అలాగే ‘దేశముదురు’ సినిమా కూడా చేయలేకపోయా. అయితే కొన్ని ప్రాజెక్ట్స్ నా కెరీర్‌లో మిస్ అయినందుకు ఏమీ బాధపడటం లేదు. ఇదొక సముద్రం.. అలలు వస్తుంటాయి. కొన్నిసార్లు సునామీలు కూడా వస్తాయి. ప్రస్తుతం ఛాయ్ బిస్కెట్ వాళ్లకు ఓ ప్రాజెక్ట్ చేస్తున్నా. సూర్య అని కొత్త దర్శకుడు. చాలా మంచి సినిమా అవుతుంది.
2023-09-19T15:28:46Z dg43tfdfdgfd