‘మార్టిన్ లూథర్ కింగ్’గా సంపూర్ణేష్ బాబు.. యోగిబాబును మరిపిస్తాడా?
తమిళ స్టార్ కమెడియన్ యోగిబాబు ప్రధాన పాత్రలో రెండేళ్ల క్రితం వచ్చిన ‘మండేలా’ (Mandela) సినిమా అక్కడ సూపర్ డూపర్ హిట్ అయ్యింది. యోగిబాబు కెరీర్‌లోనే ఒక మంచి చిత్రంగా నిలిచిపోయింది. తమిళ సినిమా ఇండస్ట్రీ నుంచి వచ్చిన పొలిటికల్ సెటైర్స్‌లో ఒకటిగా నిలిచింది. గ్రామీణ ప్రాంతాల్లోని రాజకీయాల నేపథ్యంలో తెరకెక్కిన ఈ సినిమా ఓటు విలువ ఏంటో చెప్పే మెసేజ్‌తో తెరకెక్కింది. ఎలాంటి గుర్తుంపు లేకుండా గ్రామంలోని ప్రజల జుట్టు కత్తిరించుకుంటూ జీవనం సాగించే ఒక పేద నాయీ బ్రాహ్మణుడి కథే ఈ ‘మండేలా’. ఎలాంటి గుర్తింపు లేని ఆ నాయీ బ్రాహ్మణుడికి ఓటర్ ఐడీ వస్తుంది. దానిపై పేరు ‘నెల్సన్ మండేలా’ అని ఉంటుంది.
ఇప్పుడు అదే కథను తెలుగులో రీమేక్ చేసి ‘మార్టిన్ లూథర్ కింగ్’గా తీసుకొస్తున్నారు. యోగిబాబు పోషించిన పాత్రలో సంపూర్ణేష్ బాబు నటిస్తున్నారు. వీకే నరేష్, వెంకటేష్ మహా, శరణ్య ప్రదీప్ కీలక పాత్రలు పోషిస్తున్నారు. ఈ సినిమాను ఈరోజు ప్రకటించారు. ఫస్ట్ లుక్ పోస్టర్ కూడా విడుదల చేశారు. ఈ పోస్టర్‌లో సంపూర్ణేష్ బాబు నెత్తి మీద కిరీటం.. ఆ కిరీటంలో రాజకీయ నాయకుల ఎన్నికల ప్రచార చిత్రాలు ఉంచారు. డప్పు గుర్తుకే మన ఓటు అని ఒకవైపు, లౌడ్ స్పీకర్ గుర్తుకే మన ఓటు అని మరో వైపు ప్రచారం చేసుకుంటున్నారు. నరేష్, వెంకటేష్ మహా, శరణ్య తదితరులు పోస్టర్‌లో కనిపిస్తున్నారు.
పూజా కొల్లూరు దర్శకత్వంలో రూపొందుతోన్న ఈ సినిమాను వైనాట్ స్టూడియోస్, రిలయన్స్ ఎంటర్‌టైన్మెంట్ సమర్పణలో మహాయాన మోషన్ పిక్చర్స్ బ్యానర్లపై ఎస్.శశికాంత్, చక్రవర్తి, రామచంద్ర నిర్మిస్తున్నారు. వెంకటేష్ మహా క్రియేటివ్ ప్రొడ్యూసర్. ఈ సినిమాను నిర్మాత దిల్ రాజుకు చెందిన శ్రీ వెంకటేశ్వర క్రియేషన్స్ సంస్థ విడుదల చేస్తోంది. దిల్ రాజు విడుదల చేస్తున్నారంటే కచ్చితంగా కంటెంట్ అదిరిపోవడం ఖాయం. ఇప్పటికే తమిళంలో సూపర్ హిట్ అయిన సినిమా కాబట్టి తెలుగు ప్రేక్షకులు కూడా ఆదరించే అవకాశం ఉంది. అయితే, యోగిబాబు తన కెరీర్‌లో ది బెస్ట్ యాక్టింగ్ ‘మండేలా’ సినిమాలో చేశారని అప్పట్లో విమర్శలు ప్రశంసించారు. మరి ఇప్పుడు సంపూర్ణేష్ బాబు.. యోగిబాబు మరిపించగలుగుతారా?
ఈ సినిమాను ఏపీ, తెలంగాణ అసెంబ్లీ ఎన్నికలకు ముందే థియేటర్లలోకి తీసుకు వస్తున్నారు. ఇదే సరైన సమయమని భావించిన చిత్ర యూనిట్ అక్టోబర్ 27న విడుదల చేస్తోంది. ఎన్నికల ముందు ఓటు విలువను ప్రజలకు మరోసారి ఈ సినిమా చెప్పబోతోంది. చాలా రోజుల తరవాత మళ్లీ సంపూర్ణేష్ బాబును ప్రేక్షకులు తెరపై చూడబోతున్నారు.
2023-09-19T09:43:20Z dg43tfdfdgfd
