మ్యూజిక్ డైరెక్టర్ రాజ్ ముగ్గురు కుమార్తెలు వీరే.. ఒకరు సింగర్, మరొకరు డైరెక్టర్

ప్రముఖ సంగీత ద్వయం రాజ్-కోటిలలో ఒకరైన రాజ్ (Music Director Raj) అలియాస్ తోటకూర వెంకట సోమరాజు గత ఆదివారం కన్నుమూశారు. ఆయన వయసు 63 సంవత్సరాలు. బటయ ప్రపంచానికి పెద్దగా కనిపించని ఆయన హఠాన్మరణం అందరినీ దిగ్భ్రాంతికి గురిచేసింది. ముఖ్యంగా సినీ పరిశ్రమలో ఆయనకు సన్నిహితంగా ఉండేవారిని షాక్‌కు గురిచేసింది. అయితే, రాజ్ గుండెపోటుతో మృతి చెందినట్టు ఆయన కుటుంబ సభ్యులు ధ్రువీకరించారు.

రాజ్‌కు ముగ్గురు కుమార్తెల సంతానం. అయితే, వారి గురించి బయట ప్రపంచానికి తెలీదు. ఇండస్ట్రీలో ఉన్నవారిలో కొందరికే వీరు పరిచయం. వాళ్ల పేర్లు శ్వేత, దివ్య, దీప్తి. శ్వేత, దివ్యలకు సినిమా ఇండస్ట్రీతో సంబంధాలున్నాయి. శ్వేత పలు సినిమాల్లో పాటలు పాడారు. ఇక దివ్య అసిస్టెంట్ డైరెక్టర్‌గా పనిచేస్తున్నారు. మెగాస్టార్ చిరంజీవి నటించిన ‘ఖైదీ నంబర్ 150’ సినిమాకు డైరెక్షన్ డిపార్ట్‌మెంట్‌లో దివ్య పనిచేశారు. ఈ విషయాలను సినీ విమర్శకుడు, నిర్మాత సురేష్ కొండేటి వెల్లడించారు.

రాజ్ మృతికి సంతాపంగా తెలుగు టెలివిజన్ అండ్ డిజిటల్ మీడియా మ్యుజీషియన్స్ అసోసియేషన్ ఆధ్వర్యంలో శనివారం హైదరాబాద్‌లోని తెలుగు ఫిల్మ్ ఛాంబర్‌లో సంతాప సభ ఏర్పాటు చేశారు. ఈ సందర్భంగా పలువురు మ్యుజీషియన్స్.. రాజ్‌తో తమకు ఉన్న గత స్మృతులను పంచుకున్నారు. ఈ కార్యక్రమంలో రాజ్ ముగ్గురు కుమార్తెలు కూడా పాల్గొన్నారు. తమ తండ్రి సంతాప సభను ఇంత గొప్పగా నిర్వహించినందుకు ధన్యవాదులు తెలుపుతున్నామంటూ వారు భావోద్వేగానికి గురయ్యారు.

100556552

‘ఆయనొక గొప్ప తండ్రి, గొప్ప స్నేహితుడు, గొప్ప భర్త. మా అమ్మానాన్న చాలా అన్యోన్యంగా ఉండేవారు. పిల్లలుగా మాకు కూడా ఎప్పుడూ మీరు ఇలాగే ఉండాలి, ఇదే చేయాలి అని షరతులు పెట్టలేదు. జీవితమంటే ఏంటో మీరే నేర్చుకోవాలి అని చెప్పాలి. నీకు నచ్చింది నువ్వు చేయి.. నువ్వు నేర్చుకో అని చెప్పారు. ఈరోజు మా ముగ్గురినీ ఎక్కడికి పంపినా మేం బతకగలం. ఆ బలం మాకు ఇచ్చింది మా నాన్న. ఆడపిల్లలు.. వెనక్కి తగ్గి ఉండాలి అనే ఆలోచనతో మా నాన్న ఏరోజూ చూడలేదు. మాకు చాలా ధైర్యం ఇచ్చారు. ఆయన భౌతికంగా మన ముందు లేకపోయినా ఆయన ఆత్మ ఎప్పుడూ మనతోనే ఉంటుంది. ఆయన్ని గౌరవిస్తూ ఇంత మంచి కార్యక్రమం నిర్వహించిన అందరికీ ధన్యవాదాలు’ అని ఒక కుమార్తె మాట్లాడుతూ అన్నారు.

ఇక ఇదే కార్యక్రమంలో పాల్గొన్న నటుడు శివాజీ రాజా మాట్లాడుతూ.. తనకు రాజ్ దూరపు చుట్టమని చెప్పారు. తాను ఆర్టిస్ట్ అవుదామని అనుకుంటున్నప్పుడు మొదటిసారి వెళ్లింది రాజ్ ఇంటికేనని అన్నారు. రాజులు చాలా మంది ఉంటారు కానీ అందులో మంచి రాజులు కొంత మందేనని అలాంటి వారిలో రాజ్ ఒకరని కొనియాడారు. ‘రాజ్ తండ్రి ఇదే సినీ పరిశ్రమలో చాలా కాలం ఉన్నారు. తండ్రి సినీ పరిశ్రమలో ఉన్నా రాజ్‌కు ఎలాంటి అహంకారం, బేషజాలు ఉండేవి కాదు. నా ప్రొడక్షన్‌లో ఒక సీరియల్ చేయాలని భావించినప్పుడు రాజ్‌తో సాంగ్ చేయించాలని ఆయన దగ్గరికి వెళ్లాను. కథ విని ఆయన ఒక పాత్ర వేస్తానని అన్నారు. మీరు వేయలేరండి అని చెప్పాను. లేదు లేదు నేనే వేస్తాను. తూర్పుగోదావరిలో షూటింగ్ అంటున్నావు ఒక 10 రోజులు ఎంజాయ్ చేస్తాను అన్నారు. అది రిక్షా తొక్కే పాత్ర. ఆయన రిక్షా తొక్కలేక వెనక కూర్చున్న పృథ్వీని ముందుకు రప్పించి ఆయన వెనక్కి వెళ్లిపోయారు’ అని శివాజీ రాజా చెప్పుకొచ్చారు.

2023-05-27T17:00:00Z dg43tfdfdgfd