BRAHMAMUDI TODAY ఏప్రిల్ 19 ఎపిసోడ్: ‘బాబు తండ్రి.. రాజ్‌ కాదు సుభాష్!’ అపర్ణకి.. సవతే బుడ్డోడి తల్లి! వాటే ట్విస్ట్

Brahmamudi 2024 April 19 Episode: అపర్ణా దేవి పరువు గంగలో కలిసినట్లే.. ఆ బాబు ఎవరి బిడ్డో స్పష్టత వచ్చేసింది. బాబు‌కి రాజ్ అన్న వరస కావడమే ఇక్కడ ట్విస్ట్. అసలేం జరిగిందో.. ఇప్పుడు ఆ వివరాలు చూద్దాం. photo courtesy by star maa and disney+ hotstar)

Brahmamudi 2024 April 19 Episode: బాబు తండ్రిపై స్పష్టత వచ్చేసింది!. అది కాస్తా కావ్య చెవిన పడింది. ఈ క్రమంలోనే నేటి కథనం కీలకంగా మారింది. ద్యావుడా అనిపించే ట్విస్ట్, ఇతర హైలైట్స్ ఇప్పుడు చూద్దాం. స్వప్న, అనామిక, ఇందిరా దేవి, సీతారామయ్య, సుభాష్, ప్రకాశం, ధాన్యలక్ష్మీ.. అంతా హాల్లో కూర్చునే ఉంటారు. ఇంతలో రుద్రాణి వచ్చి.. అపర్ణా దేవి పక్కనే కూర్చుని.. ‘రోజు కాఫీ పెట్టే కోడలు గుడికి వెళ్లింది.. ఈ కోడలినైనా(అనామికను) టీ పెట్టమనొచ్చు కదా?’ అంటుంది. వెంటనే ధాన్యం.. ‘నీ కోడలు కూడా ఇక్కడే ఉంది కదా.. తనని పెట్టమనొచ్చు కదా?’ అంటుంది వెటకారంగా. ‘ఏం.. ఎంత సేపు కోడళ్లు పెట్టిస్తే తాగడమే కానీ.. అత్తలు పెట్టుకుని తాగొచ్చు కదా?’ అంటూ స్వప్న చురకలు వేస్తుంది. ‘నన్ను ఎందుకు కలుపుతావ్?’ అంటుంది ధాన్యం కోపంగా. బాబు కోసం తపించిన కుటుంబం.. కానీ..

‘మీరు మాత్రం నన్ను కలపలేదా? అయినా మనందరం ఒకరి మీద ఒకరు కల్లాపు కలుపుకున్నట్లు కలుపుకుని.. జల్లుకోవడం మానేస్తే బాగుంటుంది’ అంటూ స్వప్న.. ధాన్యలక్ష్మీ నోరు మూయిస్తుంది. ఇంతలో బాబు ఏడుపు కింద దాకా వినిపిస్తూ ఉంటుంది. రాజ్ మాత్రం బాబును ఊరుకోబెట్టే ప్రయత్నం చేస్తూనే ఉంటాడు. అయినా బాబు ఏడుస్తూనే ఉంటాడు. పైగా రాజ్‌కి అప్పటికే భయమేసి.. డాక్టర్‌కి కాల్ చేస్తాడు. ‘బాబు కడుపుని చిన్నగా నొక్కి చూడండి.. మెత్తగానే ఉందా.. అయితే ఫర్వాలేదు.. మోషన్‌కి వెళ్తున్నాడా? వెళ్తుంటే ఫర్వాలేదు’ అంటూ ప్రశ్నలు వేసి.. అలానే ఏడుస్తూ ఉంటే.. ఓ రెండు గంటలు చూసి.. ఆసుపత్రికి తీసుకుని రమ్మంటుంది డాక్టర్. సరే అంటాడు రాజ్.

వెళ్లు చిట్టీ.. వీళ్లు కదిలేలా లేరు.. నువ్వు వెళ్లు..

ఇక బాబును ఓదార్చే క్రమంలో ఊయల్లో ఉన్న వాడ్ని ఎత్తుకుంటాడు రాజ్. ఇక కిందున్న స్వప్న అందరితో.. ‘బాబు అంతగా ఏడుస్తుంటే వెళ్లి చూడాలని లేదా.. మీలో మానవత్వం లేదా? రాజ్ ఏమీ పందమంది పిల్లల్ని కని పెంచినవాడేం కాదు. పైగా కావ్య కూడా ఇంట్లో లేదు.. వాడు అలా ఏడుస్తుంటే భయమేస్తుంది’ అంటుంది. అందరి మనసులోనూ జాలి కలుగుతుంది కానీ.. కదలకుండా.. ‘నువ్వు వెళ్లొచ్చు కదా? అన్ని కబుర్లు చెప్పే బదులు’ అంటూ వెటకారం చేస్తారు స్వప్నను రుద్రాణి కో బ్యాచ్. వెంటనే సీతారామయ్య... ‘చిట్టీ(ఇందిరా దేవి).. నువ్వు వెళ్లు.. వీళ్లెవ్వరూ కదిలేలా లేరు. వెళ్లి బాబుకి ఏమైందో చూడు’ అంటాడు.

వెళ్లు కావ్యా.. బాబుకి ఏమైందో చూడు..

అయితే ఇంతలో కావ్య గుడి నుంచి రావడంతో.. ‘హమ్మయ్యా వచ్చావా? బాబు ఇందాకటి నుంచి ఒకటే ఏడుపు కావ్యా.. ఒకసారి చూసి.. బాబుని తీసుకునిరా.. ఇక్కడ వీళ్లంతా కాళ్లకు సంకెళ్లు వేసుకున్నారు’ అంటుంది స్వప్న కావ్యతో. ఇక ఆ మాట వినగానే.. కావ్య పైకి పరుగుతీస్తుంది. బాబుని రాజ్ దగ్గర నుంచి.. తాను ఎత్తుకుని.. ‘ఏమైంది... అయ్యో ఒల్లు కాలిపోతుంది.. పదండి ఆసుపత్రికి తీసుకుని వెళ్తాం’అంటూ రాజ్‌ని తొందపెట్టి.. తను హ్యాండ్ బ్యాగ్ కూడా భుజాన్న వేసుకుని కిందకు పరుగుతీస్తుంది కావ్య. ఇక చుట్టూ అంతా మూగుతారు. ‘ఏమైంది బాబుకి?’అంటుంది ఇందిరా దేవి కంగారుగా. రుద్రాణి వెంటనే బాబు ఒంటి మీద చేయి వేసి.. ‘జ్వరంగా ఉందమ్మా బాగా’ అంటుంది.

అపర్ణ గుండెల్లో జాలి..

‘అయ్యో.. పదండి వెళ్దాం ఆసుపత్రికి’ అంటాడు సుభాష్ కంగారుగా. ‘అయ్యో అన్నయ్యా.. వదిన రూల్ పాస్ చేసింది కదా.. ఎవ్వరూ సహాయం చేయొద్దు అని’ అంటుంది రుద్రాణి కావాలనే. ‘నేను రూల్ పాస్ చేసింది రాజ్ కోసం.. బాబు కోసం కాదు.. త్వరగా వెళ్లండి’ అంటుంది అపర్ణా దేవి బాబు వైపు జాలిగా చూస్తూ. బాబు ఏడుస్తూనే ఉంటాడు. సీన్ కట్ చేస్తే.. బాబుని తీసుకుని.. కావ్య, రాజ్, సుభాష్ ముగ్గరూ ఆసుపత్రికి వెళ్తారు. బాబుని అబ్జర్వేషన్‌లో ఉంచాలి అని డాక్టర్ చెబుతుంది. దాంతో కావ్య, రాజ్, సుభాష్ బయటే కూర్చుంటారు.

హడలెత్తించిన రుద్రాణి.. కడిగిపారేసిన కావ్య..

అప్పుడే కావ్య.. రాజ్ మీద కోప్పడుతుంది. ‘పిల్లాడు అంతగా ఏడుస్తుంటే.. ఒళ్లు కాలిపోతుంటే.. ఆసుపత్రికి తీసుకెళ్లాలని కూడా తెలియదా? మీరేం తండ్రి అండీ?’ అంటూ తిట్టిపోస్తుంది. ‘అసలే గిల్టీగా ఫీల్ అవుతున్నాడు.. వదిలెయ్ అమ్మా కావ్యా’ అంటాడు సుభాష్. దాంతో కావ్య కాస్త కూల్ అవుతుంది. మరోవైపు దుగ్గిరాల ఇంట్లో.. అంతా బాబుకి ఎలా ఉంటుందో? అని కంగారుపడుతుంటే.. రుద్రాణి రచ్చలేపుతుంది. ‘ఇప్పుడు ఆ బాబుకి జరగరానిది ఏదైనా జరిగితే.. ఆ విషయం బాబు తల్లికి తెలిస్తే.. తను ఊరుకుంటుందా..? మనం అంతా జైలు పాలు అయిపోతాం.. అది ఇది..’ అంటూ భయపెడుతూ మాట్లాడుతుంది.

కావ్యని తిట్టిన డాక్టర్..

దాంతో ధాన్యం కూడా రుద్రాణి మాటలకు జతకూడి రెచ్చిపోతుంది. దాంతో అపర్ణా దేవి అందరి నోళ్లు మూయిస్తూ.. ‘బాబు క్షేమంగా తిరిగి రావాలని కోరుకుంటున్నాను.. అలా వస్తే.. రాజ్‌ చేత ఎలాగైనా నిజం చెప్పించి.. బాబుని తల్లి దగ్గరకు చేరేలా చేస్తాను’ అంటుంది. ఇక మరోవైపు డాక్టర్.. రిపోర్ట్స్ వచ్చాయి మాట్లాడాలి రండి అంటూ.. కావ్య, రాజ్, సుభాష్‌లను పిలుస్తుంది. కావ్య బాబుని ఎత్తుకుని నిలబడటంతో.. ఆమె బాబు తల్లి అనుకుని.. ‘అసలు బాబు పాలు ఎందుకు తాగడం లేదు.. తల్లి పాలు ఎందుకు ఇవ్వడం లేదు.. మీరు చూస్తే అన్నీ తెలిసినవాళ్లలానే ఉన్నారు కదా? బాబుకు తల్లి పాలు అవసరం అని మీకు తెలియదా?’ అంటూ ఉంటుంది డాక్టర్.

డాక్టర్ క్లారిటీ..

‘డాక్టర్.. నేను వీడి తల్లిని కాదు..’ అంటుంది కావ్య బాధగా. ‘అయ్యో సారీ అమ్మా.. బాబు తల్లికి ఏమైంది? ఎందుకు బాబుని తల్లిని దూరంగా ఉంచారు?’ అంటుంది డాక్టర్. రాజ్ ఇబ్బంది పడుతూ ఉంటే.. సుభాష్.. ‘కొన్ని కారణాలు వల్ల వాడి తల్లి దూరంగా ఉంది డాక్టర్’ అంటాడు. ‘అదిసంగతి.. ముందు బాబుకి తల్లి స్పర్శకావాలి. తల్లి ప్రేమ కావాలి. ఆ తల్లి పాలు కావాలి.. ముందు ఏది ఏమైనా బాబుని తల్లి దగ్గరకు చేర్చండి. ఇప్పుడు బాబుకు ఏ వైద్యం పని చేయదు.. తల్లి మాత్రమే బాబుని సముదాయించగలదు’ అంటుంది డాక్టర్. బిత్తరపోతారు ముగ్గురూ.

అత్తకు నిజం చెప్పిన కళావతి..

సీన్ కట్ చేస్తే.. ఇంటికి చేరుకుంటారు ముగ్గరూ. బాబు ఏడుపు అయితే ఆపి.. కావ్య భుజం మీద మౌనంగా పడుకుని ఉంటాడు. ఇక వాళ్లు రాగానే.. అపర్ణా దేవి.. ‘ఆగండి’అంటూ అడ్డుపడుతుంది. ‘తల్లి స్థానంలో వెళ్లావ్ కదా? ఏం అన్నారు డాక్టర్?’ అంటూ కావ్యనే ఆరా తీస్తుంది అత్త. ‘నేను తల్లి స్థానంలోనే వెళ్లాను కానీ.. నేను తల్లిగా పనికి రానని డాక్టర్ చెప్పారు.. కన్నతల్లి కావాలట.. మాతృత్వానికి ఉన్న గొప్పతనం తెలిసింది. బాబుకి కన్నతల్లి మీద బెంగ మొదలైంది’ అంటూ ఎమోషనల్‌గా నిజం చెబుతుంది.

క్షమించండి నిజం చెప్పలేను..

వెంటనే అపర్ణా దేవి.. ‘ఈ అమానుషత్వానికి ఎవరు కారణం.. చెప్పు.. సమాధానం చెప్పు.. ఈ ఇంటి శశనాలు.. పరువు ప్రతిష్టలు ఆ పసివాడి ప్రాణం పోకముందే వాడి తల్లి ఎవరో చెప్పు..’ అంటూ గట్టిగానే నిలదీస్తుంది. ఆ వెనుకే కావ్య, ఇందిరా దేవి, రుద్రాణి అంతా తమదైన శైలిలో బాబు తల్లి గురించి.. రాజ్‌ని అడుగుతారు. కానీ రాజ్ నిజం చెప్పడు. తన చేతిలోని బాబు హెల్త్ రిపోర్ట్స్ పక్కనే పెట్టి మరీ.. కావ్య చేతిలో ఉన్న బాబుని తాను లాక్కుని... ‘క్షమించండి.. నేను మాత్రం ఇప్పుడు ఏ నిజం చెప్పలేను’ అంటాడు.

బాబుని ఎక్కడికి తీసుకెళ్తున్నారు డాడీ?

దాంతో అపర్ణా దేవి మరింతగా రెచ్చిపోతుంది. ‘వీడు చెప్పడు.. చెప్పడు.. ఈ బిడ్డ ప్రాణాలు మా కళ్లముందు పోకముందే.. నేనే ఓ నిర్ణయం తీసుకుంటాను’ అంటుంది ఆవేశంగా. వెంటనే కమింగ్ అప్ మొదలైపోతుంది. సుభాష్ బాబుని తీసుకుని కారులో వెళ్లిపోతుంటే.. రాజ్.. మరో కారుతో ఆ కారుకు అడ్డం పెట్టి ఆపుతాడు. ‘బాబుని ఎక్కడికి తీసుకుని వెళ్తున్నారు డాడీ?’ అంటాడు రాజ్.. సుభాష్‌తో. అయితే కావ్య ఆ దగ్గర్లోనే చాటుగా వాళ్లకు కనిపించకుండా వాళ్ల మాటలు వినడం ట్విస్ట్. ‘నువ్వు ఇప్పుడు నిజం బయటపెట్టాల్సిన సమయం వచ్చింది’ అంటాడు సుభాష్.