CHILD ARTIST CHAITRA LAKSHMI: మా అమ్మ, నాన్న చెవిటి మూగ.. వాళ్లకి మాటలు రావాలనే ఇలా చేస్తున్నా: కార్తీకదీపం 2 చిన్నారి చైత్ర ఎమోషనల్

రీసెంట్‌గా హీరో సంపూర్ణేష్ బాబు నోటి నుంచి అద్బుతమైన మాట వచ్చింది. ‘ఏ మనిషి కూడా.. బతకలేకపోవడం అంటూ ఉండదు.. ఎలాగోలా బతుకుతాడు. కానీ ఎప్పుడైతే మనం ఎదుటి వాడిలా బతకాలని.. అలా బతకాలి.. ఇలా బతకాలి అని అనుకుంటామో అప్పుడే బతుకు భారంగా మారుతుంది.. అప్పుడే బతకలేం అనిపిస్తుంది’ అని. అతను మాట్లాడిన ప్రతి మాట అక్షర సత్యం.. జీవిత సత్యం. చిన్న కష్టం వస్తే బతుకు భారం అనిపిస్తుంటుంది చాలామందికి. కాళ్లూ చేతులు లేనివాడు కూడా హ్యాపీగా బతికేస్తుంటాడు. కానీ అన్నీ ఉన్నోడు మాత్రం బతుకు భారం అనుకుంటాడు. కార్తీకదీపం 2 సీరియల్‌లోని ఈ చిన్నారి చైత్ర లక్ష్మి రియల్ లైఫ్ చూస్తే.. ఎంతోమందికి ప్రేరణగా నిలవొచ్చు.

స్టార్ మా ఛానల్‌లో ప్రసారం అవుతున్న ‘కార్తీకదీపం 2’ సీరియల్‌లో దీప కూతురు శౌర్యగా నటిస్తోంది చిన్నారి చైత్ర లక్ష్మి. తన అద్భుత నటనతో ఔరా అనిపిస్తున్న ఈ చిచ్చరపిడుగు కుంకుమపువ్వు, రాధకి నీవేరా ప్రాణం వంటి సీరియల్స్‌లో నటించింది. ఇక ‘దసరా’ సినిమాలోనూ నటించిన చైత్ర లక్ష్మి‌కి ‘కార్తీకదీపం 2’ సీరియల్‌లో అవకాశం లభించింది.

నిరుపేద కుటుంబంలో పుట్టి.. తల్లి ఆదరణలో తండ్రి ప్రేమ కోసం పరితపించగా బిడ్డగా తన అద్బుతమైన పాత్రతో అదరగొట్టేస్తుంది చైత్ర లక్ష్మి. బుల్లితెర బాహుబలి లాంటి కార్తీకదీపం సీరియల్‌లో నిరుపమ్, ప్రేమీ విశ్వనాథ్ లాంటి మహామహులు నటిస్తుండగా.. వాళ్లతో పోటీ పడి మరి.. ఈ చిచ్చరపిడుగు అద్భుతహ అనిపిస్తుంది.

అయితే ఈ చిన్నారి చైత్ర లక్ష్మి పేరెంట్స్ మాట్లాడలేరు. వినలేరు. పుట్టుకతోనే చెవిటి మూగ వాళ్లైన ఈ జంటకు చైత్ర లక్ష్మి జన్మించింది. దేవుడు వాళ్లిద్దర్నీ చెవిటి మూగలా పుట్టించి అన్యాయం చేశాడనుకుంటే.. వాళ్ల కడుపున చిచ్చరపిడుగు లాంటి కూతురు జన్మించడం నిజంగానే దేవుని మేలు అనే చెప్పాలి. ఎందుకంటే.. వాళ్లు మాట్లాడలేకపోవచ్చు కానీ.. తన కూతురు తమ ఎదుట మాట్లాడటం ఒక వరం అయితే.. తన కూతుర్ని ఇలా టీవీలలో చూసి.. అంతా ఆమె గురించే మాట్లాడుకోవడం చూసి ఆ చెవిటి, మూగ తల్లిదండ్రులు.. ఇంతకంటే మాకు ఏం కావాలి? అంటూ సంతోషాన్ని పంచుకుంటున్నారు.

అయితే ఇక్కడ కళ్లు చెమ్మగిల్లే విషయం ఒకటి చెప్పింది చైత్ర లక్ష్మి. ‘మీ అమ్మ నాన్న చెవిటి మూగ కదా.. వాళ్లని అలా పుట్టించినందుకు దేవుడుపై కోపం లేదా? అని అడిగితే.. ‘ఏం లేదు.. వాళ్ల మాటల్ని కూడా నేనే మాట్లాడేస్తున్నా కదా’ అని ఆ చిన్నారి మాట్లాడిన మాట చూస్తే ఎవరికైనా కళ్లు చెమ్మగిల్లుతాయి. అంతేకాదు.. అమ్మకి నాన్నకి మాటలు రావాలని దేవుడికి రోజూ దండం పెట్టుకుంటున్నాను.. దేవుడికి పూజ చేస్తాను.. మా అమ్మా నాన్నకి మాటలు రావాలనే దేవుడికి పూజ చేస్తాను. ఆ దేవుడ్ని మా అమ్మ, నాన్నకి మాటలు రావాలని దేవుడ్ని కోరుకుంటాను’ అంటూ దండం పెట్టి మరీ ఆ చిన్నారి చెబుతుంటే.. దుఃఖంతో గుండె బరువెక్కిపోతుంది.

అయితే చైత్ర లక్ష్మి ఆలనా పాలనా మొత్తం తన అమ్మమ్మ, తాతయ్యలే చూసుకుంటున్నారు. చైత్ర లక్ష్మి.. తన తల్లిదండ్రులతోనే ఉంటుంది కానీ.. అమ్మమ్మ, తాతయ్యల సహకారంతోనే నటనవైపు వచ్చింది చైత్ర లక్ష్మి.

చైత్ర లక్ష్మికి సీరియల్స్‌లో అవకాశాలు కూడా తన అమ్మమ్మ బంధువుల ద్వారానే సీరియల్స్‌లో అవకాశం వచ్చింది. మొదటిగా దసరా సినిమాలో అవకాశం వచ్చింది. ఆ సినిమా చూసి.. కుంకుమపువ్వు సీరియల్‌లో అవకాశం ఇచ్చారు. ఆ సీరియల్ తరువాత.. నిరుపమ్ హీరోగా చేసిన ‘రాధకి నీవేరా ప్రాణం’ సినిమాలో అవకాశం వచ్చింది.

ఇక తన మనవరాలి గురించి చైత్ర లక్ష్మి అమ్మమ్మ మాట్లాడుతూ.. ‘‘ఎంత పెద్ద డైలాగ్ అయినా కూడా సింగిల్ టేక్‌లోనే చెప్పేస్తుంది. అమ్మాయి విషయంలో ఉన్న లోటుని నా మనవరాలు తీరుస్తుంది. షూటింగ్‌లకు ఉదయాన్నే లేపడం.. చిన్నప్పుడే కష్టపెట్టడం.. చిన్నపిల్లని ఇబ్బంది పెడుతున్నాం అని అనిపిస్తుంది కానీ.. దీనికి యాక్టింగ్ అంటే చాలా ఇష్టం. నటనలో చిచ్చరపిడుగులా కనిపించే చైత్ర లక్ష్మి.. పెద్దయ్యాక డాక్టర్ అవుతానని అంటోంది. డాక్టర్‌గా చేస్తూనే యాక్టింగ్ కూడా చేస్తా.. హీరోయిన్ అవుతా’ అని అంటుంది’ అంటూ చెప్పుకొచ్చారు చైత్ర లక్ష్మి అమ్మమ్మ.

చైత్ర లక్ష్మి తల్లిదండ్రులు మాట్లాడలేరు కాబట్టి.. వాళ్లు సైగలతోనే మాట్లాడుకుంటారు. ఇక చైత్ర లక్ష్మితో కూడా వాళ్లు సైగలతోనే మాట్లాడతారు. అమ్మ నాన్నలతో మాటలైతే మాట్లాడలేను కానీ.. తనకీ సైగలు వచ్చి అని.. అమ్మతో.. నాన్నతో ఆ సైగలతోనే మాట్లాడతానని చెప్తోంది చిన్నారి చైత్ర లక్ష్మి.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-16T12:13:25Z dg43tfdfdgfd