KARTHIKA DEEPAM 2 MAY 02 EPISODE: అనసూయ అత్తని కలుసుకున్న దీప.. తిట్టిపారేసిన సుమిత్రమ్మ.. బ్యాక్ టు హోమ్

Karthika Deepam May 02 Today Episode: పారిజాతం పుల్ల పెట్టడం.. దీప బ్యాగ్ సర్దుకుని ఇంట్లో నుంచి వెళ్లిపోవడం.. ఆ తరువాత కార్తీక్ వెళ్లి ఏదొకటి చెప్పి వెనక్కి తీసుకుని రావడం ‘కార్తీకదీపం 2’లో లూపింగ్ సీన్‌గా మారింది. ఈరోజు ప్రసారం కాబోయే ఎపిసోడ్‌లో ఏమైందంటే..

పారిజాతం కుట్రలో భాగంగా దీప.. సుమిత్రి ఇంటిని వీడాల్సి వస్తుంది. ఎవరికీ చెప్పకుండా సౌర్యని తీసుకుని ఇంట్లో నుంచి వెళ్లిపోతుంది దీప. అయితే దారిలో కార్తీక్ అడ్డుకుని.. దీపని ఆపడానికి ఎంత ప్రయత్నించినా కూడా ఆమె వినిపించుకోదు. అయితే సుమిత్రపై ఎటాక్, జోత్స్న యాక్సిడెంట్‌ కేసులో దీప కీలక సాక్ష్యంగా ఉండటంతో.. సుమిత్ర ఇంటికొచ్చిన పోలీసులు.. దీపని తీసుకుని రావాల్సిందే లేదంటే మీకు ఇబ్బందులు తప్పవని చెప్పడంతో.. దీపని తీసుకుని రావడానికి బయల్దేరతాడు కార్తీక్. మరి దీప వచ్చిందో లేదో.. నేటి (మే 02) ఎపిసోడ్‌లో ఏమైందో చూద్దాం. దీప ఎక్కడుందో మీకు తెలుసా? అని కార్తీక్‌ని అడుగుతాడు ఎస్ఐ. ‘తెలుసు ఎస్ఐ గారూ.. మీరు ఎవరిపైన నిందలు వేయాల్సిన పనిలేదు.. నేను వెళ్లి దీపను తీసుకొస్తాను’ అని దీప కోసం వెళ్తాడు కార్తీక్. దీంతో సీఐ.. ఏంటండీ ఇదంతా.. మీరేమో దీప ఎక్కడికి వెళ్లిందో తెలియదని అంటారు. అతనేమో తెలుసని అంటాడు. అంతా కలిసి గేమ్స్ ఆడుతున్నారా? ఏది ఏమైనా దీపని తీసుకుని రావాల్సిందే’ అని అంటాడు. ఇక పారిజాతం అయితే.. ‘పోయేదాన్ని పోనీయకుండా వీడేంటి దాన్ని తీసుకొస్తానని బయల్దేరాడు.. వీడు వెళ్లేసరికి అది ఊరు వెళ్లిపోతే బాగుండు’ అని అనుకుంటుంది.

​వెళ్లిపోయింది దీప అయితే పారూని నిలదీస్తావ్ ఏంటి మామ్..

అయితే దీప ఎవరికీ చెప్పకుండా వెళ్లిపోవడంతో సుమిత్ర.. పారిజాతంపై అనుమానం వ్యక్తం చేస్తుంది. అత్తయ్యా.. మీరు దీప దగ్గరకు వెళ్లారా? అని అడుగుతుంది. ‘అబ్బే.. నేనెందుకు వెళ్తాను?? నాకేం అవసరం?? అని అంటుంది పారూ. ‘నిజం చెప్పండి’ అని సుమిత్ర నిలదీయడంతో.. ‘చెప్పుకుండా వెళ్లిపోయింది దీప అయితే.. నువ్వు పారూని నిలదీస్తావ్ ఏంటి మామ్.. వెళ్లేముందు ఎవరితో చెప్పకపోయినా నీతో చెప్పాలి కదా.. నా విషయంలో అవసరం లేకపోయినా.. ముందుకొచ్చి సాక్ష్యం చెప్పింది.. ఇప్పుడు తన అవసరం వచ్చేసరికి అందరితో మాటలు అనిపించడానికి చెప్పకుండా వెళ్లిపోయింది’ అని మధ్యలో కలగజేసుకుంటుంది జోత్స్న.

మనకి తెలియని విషయం బావకి ఎలా తెలిసింది?

ఏదైనా చెప్పుకోలేని విషయం ఏమో అని సుమిత్ర అనడంతో.. ‘హా.. మనతో చెప్పుకోలేని విషయం అయితే బావకి ఎలా తెలుస్తుంది? సౌర్య చెప్పిందని అనుకున్నా.. వాళ్ల దగ్గర మొబైల్ కూడా లేదు కదా.. మన ఇంట్లో ఉంటున్న దీప.. వెళ్లిపోవడం గురించి వేరే ఇంట్లో ఉంటున్న బావకి తెలిసింది కానీ.. మనకి మాత్రం తెలియలేదు. వాళ్లని తీసుకొస్తానని అన్నాడంటే దీప, సౌర్యలు ఎక్కడున్నారో బావకి తెలుసన్నట్టే కదా. అంటే.. బావకి వాళ్లు వెళ్లిపోవడం తెలుసూ.. ఎక్కడున్నారో కూడా తెలుసు. చివరికి నీతో కూడా చెప్పలేదు మమ్మీ’ అని అంటుంది జోత్స్న. దాంతో సుమిత్రి.. ‘చెప్పకుండా వెళ్లిపోయి తప్పుచేశావ్ దీపా.. ఎక్కడున్నావ్ అమ్మా’ అని బాధపడుతుంది.

మిమ్మల్ని నమ్మొచ్చా బాబూ.. ‘ఈసారికి నమ్ము దీపా’!

ఇక దీప, సౌర్యలు ఆటోలో వెళ్తుంటే.. కార్తీక్ వస్తాడు. దీపా మీరు అర్జెంట్‌గా ఇంటికి రావాలి అని అంటాడు. కాసేపు దీప నేను రాను అని ఓవరాక్షన్ చేస్తుంది. వెళ్తానని దీప.. వెళ్లొద్దని కార్తీక్ కాసేపు ఎప్పుడూ ఉండే సోదే ఉంటుంది. ఇంటికి పోలీసులు వచ్చారు? మీరు కనిపించడం లేదని గొడవ చేస్తున్నారు.. దయచేసి రండి.. పోలీసులు మిమ్మల్ని కలవాలంటున్నారు.. వాళ్లు వెళ్లిపోయిన తరువాత నేనే మిమ్మల్ని బస్ ఎక్కిస్తాను.. ప్లీజ్ రండి’ అని బ్రతిమిలాడతాడు కార్తీక్. మిమ్మల్ని నమ్మొచ్చా బాబూ అని దీప అడుగుతుంది. ఈసారి నన్ను నమ్ము దీపా? అని అంటాడు కార్తీక్.

అమ్మా.. నాన్నమ్మ అదిగో.. దీపని కలిసిన అనసూయ

చూద్దాం ఈసారి నమ్మకాన్ని ఎంత వరకూ కాపాడుకుంటారో అంటూ కార్తీక్ కారు ఎక్కేస్తుంది దీప. ఇక దీప కారులో వెళ్తుంటే.. రోడ్డుపై నడవలేక నడుస్తూ సౌర్య కంట పడుతుంది అనసూయ. ‘అమ్మా నాన్నమ్మ.. కార్తీక్ కారు ఆపు’ అని అంటుంది సౌర్య. వెంటనే దీప.. పరుగుపరుగున అత్త అనసూయ దగ్గరకు వెళ్తుంది. అత్తయ్యా నువ్వు ఇక్కడున్నావ్ ఏంటి అత్తయ్యా ఎప్పుడొచ్చావ్ అని అడుగుతుంది దీప. అవన్నీ తరువాత చెప్తాను.. ముందు తాగడానికి మంచి నీళ్లు ఇవ్వవే చచ్చిపోయేట్టు ఉన్నాను ’ అని అంటుంది అనసూయ. ఇంతలో సౌర్య.. కార్తీక్‌తో వచ్చి.. ఇదిగో ఈమె మా నాన్నమ్మ నాకోసమే వచ్చింది అని పరిచయం చేస్తుంది.

ఎవరు దీపా అతనూ..

ఇంతలో కార్తీక్‌కి ఇంటి దగ్గర నుంచి ఫోన్ రావడంతో.. మనం వెంటనే వెళ్లాలి అని అంటాడు కార్తీక్. ఆ తరువాత అనసూయకి వాటర్ బాటిల్ తెచ్చి ఇస్తాడు కార్తీక్. ఎవరమ్మా దీపా ఇతనూ అని అనసూయ అడగడంతో.. ‘కార్తీక్.. నా ఫ్రెండ్’ అని చెప్తుంది సౌర్య. ఇంతలో కార్తీక్‌కి పదే పదే ఫోన్లు రావడంతో.. మనం వెళ్లాలి దీపా అని అంటాడు కార్తీక్. ‘మా అత్తయ్య కూడా మనతోనే వస్తుంది’ అని అంటుంది దీప. ‘పర్లేదు రమ్మనండి.. కారు ఎక్కండి’ అని అంటాడు కార్తీక్. ఇక అనసూయ.. ‘దీప ఏంటి కారులో తిరుగుతుంది.. ఇంతకీ ఇతను ఎవరు? ఈ బుడ్దది పేరు పెట్టి పలుస్తుంది ఏంటి? అని సందేహిస్తూ ఉంటుంది.

దీపపై మండిపడ్డ అనసూయ.. ఆ విషయం మాట్లాడొద్దు!!

మొత్తానికి అనసూయని వెంటపెట్టుకుని సుమిత్ర ఇంటికి తిరిగి బయల్దేరుతుంది దీప. ఇక కారులో వెళ్తూ.. వెళ్తూ.. ‘ఊరు నుంచి ఎప్పుడు వచ్చావ్ అత్తయ్యా’ అని అడుగుతుంది దీప. ఆ మాటతో మండిపడుతుంది అనసూయ. ‘నేను వచ్చి రెండు రోజులు అవుతుంది.. నీ కోసం వెతుక్కుంటూ తిరుగుతున్నా.. ఎక్కడ ఉండాలో తెలియక.. బస్ స్టాండ్‌లో పడుకుంటున్నా.. ఎవడో దొంగసచ్చినోడు నా కొంగుకి కట్టుకున్న డబ్బులు కొట్టేశాడు. చేతిలో రూపాయి లేకుండా.. నానా తప్పలు పడుతున్నాను. మంచి నీళ్లు కొడుక్కోవడానికి కూడా రూపాయి లేదు. ఇంతకీ నా కొడుకు సంగతి ఏంటి? అని అడుగుతుంది అనసూయ. అన్నీ ఇంటికి వెళ్లిన తరువాత మాట్లాడుకుందాం అత్తయ్యా అని అంటుంది దీప.

ఏంటీ సైకిల్‌ని అమ్మేశావా?? సౌర్య ఏడుపు

నా సైకిల్ ఎలా ఉంది? దాన్ని తెచ్చుకోవడానికే మేం ఇంటికి బయల్దేరాం తెల్సా నానమ్మా.. అని అంటుంది సౌర్య. ఇంకెక్కడి సైకిలే.. దాన్ని ఎప్పుడో అమ్మేశాను. మీ అమ్మ డబ్బులు పంపకపోతే.. నేను ఏం తిని బతకాలే.. అందుకే ఆ సైకిల్ అమ్మేశాను అని అంటుంది అనసూయ. దాంతో సౌర్య.. ‘నా సైకిల్ అమ్మేశావా? అది నా ఫ్రెండ్.. అంటూ ఏడుస్తుంది. దాంతో దీప.. ‘నీకు ఇంకోసైకిల్ కొనిస్తాలే.. గొడవ చేయకు.. ఇంటికి వెళ్లిన తరువాత మాట్లాడదాం అని సౌర్యని కంట్రోల్ చేస్తుంది దీప. అత్తయ్య ఇక్కడికి వచ్చిదంటే.. ఊరిలో ఏం జరిగిందో ఏంటో అని భయపడుతూ ఉంటుంది దీప.

ఇదిగో దీపను తీసుకొచ్చా.. ‘దీపే ఎక్స్ ట్రా అనుకుంటే.. మళ్లీ ఆమె వెనుక ఈమె ఎవరబ్బా’

ఇక దీపతో పాటు.. అనసూయ, సౌర్యని తీసుకుని వస్తాడు కార్తీక్. పెద్ద బంగ్లా ముందు కారు ఆపడంతో ఆశ్చర్యంగా చూస్తుంది అనసూయ. ఇంటి ముందు పోలీసులు ఉండటం చూసి.. వీళ్లేంటే ఇక్కడున్నారూ అని దీపని అడుగుతుంది అనసూయ. ‘నాకోసమే వచ్చారు.. అని అంటుంది దీప. ‘ఓసినీ నీకోసం రావడం ఏంటి? నువ్వేం చేశావ్ అని కంగారు పడుతుంది అనసూయ. అన్నీ తరువాత చెప్తాను.. మీరు ముందు లోపలికి రండి అత్తయ్యా అని అంటుంది దీప. ఆ తరువాత కార్తీక్.. ‘దీపని తీసుకుని వచ్చాను’ అని లోపలికి తీసుకొస్తాడు. వాళ్లని చూసిన పారిజాతం.. ‘దీపే ఎక్స్ ట్రా అనుకుంటే.. దాంతో పాటు ఇంకో ఎక్స్ ట్రాని తీసుకుని వచ్చింది.. ఎదెవరబ్బా’ అని ఆశ్చర్యంగా చూస్తుంది.

వీళ్లకి ఏం సమాధానం చెప్పాలి.. దీపపై సుమిత్ర ఫైర్

దీపని చూడగానే సుమిత్ర ఫైర్ అవుతుంది. ‘ఏంటి దీపా ఇదీ.. నువ్వు ఎక్కడికీ వెళ్లాల్సిన అవసరం లేదని ఇక్కడే ఉండొచ్చని చెప్పాను కదా.. నీకు అర్ధం కాలేదా? లేక నా మాటకి విలువ ఇవ్వాల్సిన అవసరం లేదనుకుంటున్నావా? అసలు నువ్వు ఎవరికి చెప్పి వెళ్లావ్.. మీరు బాధ్యత తీసుకున్న మనిషి మీకు చెప్పకుండా వెళ్లిపోతుందా? అని సీఐ గారు అడుగుతున్నారు. ఆయనకి ఏం సమాధానం చెప్పాలి? అని నిలదీస్తుంది సుమిత్ర. అది చూసిన అనసూయ.. ‘ఈవిడెవడ్రా బాబూ.. నాకంటే ఎక్కువగా దీపని నిలదీస్తుంది. అయినా దీపని సొంత మనిషి అన్నట్టుగా మాట్లాడతారేంటి? ఈ పోలీసులు ఏంటో ఈ గోల ఏంటో అని అనుకుంటుంది.

నిన్ను వెళ్లిపోమన్న ఆ మనిషి ఎవరు??

నువ్వు వెళ్లాలనుకుంటే నాతో చెప్పి వెళ్లాలి కదా.. ఊరికే అందరితో మాటలు పడేట్టు చేయొద్దు దీపా? అని అరుస్తుంది సుమిత్ర. దాంతో సీఐ.. ‘ఏంటి దీపా.. మీ మేడమ్ గారు నీపై చూపిస్తున్న కోపం నిజమేనా? లేదంటే.. మేడమ్ గారే నిన్ను వెళ్లిపోమని చెప్పారా? నువ్వు మౌనంగా ఉన్నావంటే.. నువ్వు వెళ్లిపోవడానికి కారణం ఏదో ఉంది. ఎవరో కావాలనే వెళ్లగొట్టారు? ఏంటి దీపా.. నేను చెప్పింది కరెక్టేగా.. నిన్ను వెళ్లిపోమన్న ఆ మనిషి ఎవరు? అని అడుగుతాడు. వామ్మో దీప నిజం చెప్పేస్తుందా? అని పారిజాతం కంగారు పడుతుండగా.. మన మంచి దీప మాత్రం.. ‘నన్ను ఎవరూ వెళ్లిపోమనలేదు.. నేనే వెళ్లాను’ అని అంటుంది.