ASHADA MASAM 2024: ఆషాఢ మాసం ప్రాముఖ్యతలేంటి.. ఈ కాలంలో శుభకార్యాలు ఎందుకు నిషేధించారో తెలుసా..

Ashada Masam 2024 తెలుగు పంచాంగం ప్రకారం, జూలై 6వ తేదీ శనివారం నుంచి ఆషాఢ మాసం ప్రారంభం కానుంది. ఈ కాలంలో ఎలాంటి శుభకార్యాలను చేయరు. అయితే పూజలకు, ఉపవాస దీక్షలకు ఈ మాసం ఎంతో పవిత్రమైనది. ఈ సందర్భంగా ఆషాడ మాసం విశిష్టత, పాటించాల్సిన నియమాలేంటో ఇప్పుడు తెలుసుకుందాం...

Ashada Masam 2024 హిందూ క్యాలెండర్ ప్రకారం, ఛైత్ర మాసంతో కొత్త ఏడాది ప్రారంభమై.. ఫాల్గుణ మాసంతో ముగుస్తుంది. ఈ క్రమంలోనే నాలుగో నెలలో ఆషాఢ మాసం వస్తుంది. ఈ కాలంలో కొత్తగా పెళ్లైన దంపతులు కలవకూడదనే ఆచారాలను పాటిస్తారు. కొత్తగా పెళ్లయిన వధువును పుట్టింటికి పంపుతారు. దీని వెనుక శాస్త్రీయ కారణాలు కూడా ఉన్నాయని పెద్దలు చెబుతారు. మరోవైపు ఈ మాసం వ్యవసాయానికి చాలా ముఖ్యమైనది. ఈ కాలంలో తీర్థయాత్రలు, భగవంతుని ప్రార్థన, మంత్రాలు పఠించడం, తపస్సు చేయడం వల్ల ఎంతో పుణ్యం లభిస్తుందని చాలా మంది నమ్ముతారు. ఈ నెలలోనే గురు పూర్ణిమ, దేవశయన ఏకాదశి, బోనాల ఉత్సవాలు వంటి ముఖ్యమైన ఉపవాస, పండుగలను జరుపుకుంటారు. ఛాతుర్మాసం కూడా ఈ నెలలోనే ప్రారంభమవుతుంది. పురాణాల ప్రకారం, ఈ కాలంలో శ్రీ మహా విష్ణువు నాలుగు నెలల పాటు విశ్రాంతి తీసుకుంటాడు. అందుకే ఈ కాలంలో శుభ కార్యాలు చేయడాన్ని నిషేధించారు. ఈ సందర్భంగా ఆషాఢ మాసం ప్రాముఖ్యత గురించి మరిన్ని వివరాలను ఇప్పుడు తెలుసుకుందాం...ఆషాఢ మాసం ఎప్పటినుంచి ప్రారంభమంటే..

ఆషాఢ మాసం 06 జూలై 2024, శనివారం రోజున ప్రారంభమవుతుంది. వచ్చే నెల అంటే 04 ఆగస్టు 2024న ముగుస్తుంది. ఆ తర్వాత శ్రావణ మాసం ప్రారంభమవుతుంది. ఆషాఢ మాసంలోనే పుర్వాషాఢ, ఉత్తరాషాఢ నక్షత్రాలొస్తాయి. ఆషాఢ పౌర్ణమి రోజున చంద్రుడుఈ రెండింటి మధ్య ఉంటాడు అందుకే ఈ మాసాన్ని ఆషాఢ మాసం అంటారు.

ఆషాఢ మాసం ప్రాముఖ్యత..

ఆషాఢ మాసంలో శ్రీ మహా విష్ణువును పూజించడం చాలా విశిష్టమైనది. ఈ కాలంలో మట్టి కుండ, గొడుగు, ఉప్పు, జామకాయలను దానం చేస్తే ఎంతో పుణ్యం లభిస్తుందని చాలా మంది నమ్ముతారు. శాస్త్రాల ప్రకారం, ఈ నెలలో ఎక్కువ యాగాలు చేయాలి. ఈ నెల నుంచే వర్షాకాలం ప్రారంభమవుతుంది. అందుకే ఈ మాసంలో హవనం, లేదా యాగం నిర్వహించడం వల్ల హానికరమైన కీటకాలు, గాలి, నీటి నుంచి వచ్చే ఇన్ఫెక్షన్ల నుంచి తప్పించుకోవచ్చు. మరోవైపు గురు పూర్ణిమ నాడు గురువులను ఆరాధించడం వల్ల మీ జీవితంలో సంతోషంత, ఐశ్వర్యం కలుగుతాయని పండితులు చెబుతారు. దీంతో పాటు గుప్త నవరాత్రులలో దుర్గా మాత ఆరాధన, శక్తికి పవిత్రమైనది. ఆషాఢ మాసంలో సూర్యుడు, అంగారకుడిని పూజించడం ద్వారా శక్తి స్థాయి మెరుగుపడుతుంది.

కొత్త జంటలు కలవకుండా..

ఆషాఢ మాసంలో దేవశయన ఏకాదశి రోజు నుంచి శ్రీ మహా విష్ణువు నిద్రలోకి వెళ్తాడు. అందుకే ఆ సమయం నుంచి ఎలాంటి శుభకార్యాలు చేయకూడదని పండితులు చెబుతారు. అయితే విష్ణుమూర్తిని పూజించడం, మంత్రాలను జపించడం శుభప్రదంగా పరిగణిస్తారు. ఈ కాలంలో నీటిని వృథా చేయకూడదు. అలాగే దానధర్మాలకు విశేష ప్రాధాన్యత ఇవ్వడం మరిచపోవద్దు. ఈ నెల రోజుల పాటు కొత్తగా పెళ్లయిన జంటలు కలవకుండా జాగ్రత్త పడతారు.

పూజా విధానం..

ఈ మాసంలో శ్రీ మహా విష్ణువుతో పాటు ఈశ్వరుడు, హనుమాన్, సూర్య దేవుడు, అంగారకుడిని పూజించాలి. ఎవరి జాతకంలో అయితే కుజుడు, సూర్యుడు బలహీనంగా ఉంటాడో ఆషాఢంలో శివుడు, శ్రీహరితో పాటు దుర్గాదేవిని పూజించాలి. ఈ మాసంలో సూర్యోదయం కంటే ముందే నిద్ర లేచి స్నానం చేసి, సూర్యుడికి అర్ఘ్యం సమర్పించడం వల్ల శారీరక బాధలన్నీ తొలగిపోతాయి. ఆషాఢ అమావాస్య సమయంలో పూర్వీకులను స్మరించుకుంటూ శ్రాద్ధ కర్మలు, తర్పణం నిర్వహించాలి. ఇలా చేయడం పూర్వీకుల అనుగ్రహం పొందొచ్చు. సూర్య భగవానుడిని పూజించేటప్పుడు గాయత్రీ మంత్రాన్ని 10 సార్లు జపించాలి. ఈ కాలంలో శివాలయానికి వెళ్లి పూజలు చేయడం వల్ల కాల సర్ప దోషం తొలగిపోయి.. శివుని అనుగ్రహం లభిస్తుంది.

బోనాల సంబురాలు ప్రారంభం..

మరోవైపు అమావాస్య తర్వాత వచ్చే గురువారం నుంచి బోనాల సంబురాలు ప్రారంభం కానున్నాయి.హైదరాబాదులోని చారిత్రక గోల్కొండ కోటలోని శ్రీ జగదాంబిక(ఎల్లమ్మ) ఆలయంలో తొలి పూజ చేసిన తర్వాతే రాష్ట్ర వ్యాప్తంగా బోనాల సందడి ప్రారంభమవుతుంది. గోల్కొండ తర్వాత సికింద్రాబాద్ ఉజ్జయిని మహంకాళి, లాల్ దర్వాజ మహాకాళి బోనాలను నిర్వహించి, ఆషాఢ మాసం చివరి రోజున తిరిగి గోల్కొండ కోటలో చివరి బోనంతో పూజలు చేసి ఉత్సవాలను ముగిస్తారు. గోల్కొండలో ఉండే జగదాంబిక అమ్మవారికి తొలి బంగారు బోనం సమర్పించే ఆనవాయితీ కుతుబ్ షా కాలం నుంచి రావడం విశేషం.గమనిక : ఇక్కడ అందించిన భక్తి సమాచారం, పరిహారాలన్నీ మత విశ్వాసాలపై ఆధారపడి ఉన్నాయి. ఇవి కేవలం ఊహాల ఆధారంగా ఇవ్వబడింది. దీనికి సంబంధించి ఎలాంటి శాస్త్రీయ ఆధారాలు లేవు. ఈ సమాచారాన్ని మీరు పరిగణనలోకి తీసుకునేందుకు సంబంధిత నిపుణులను సంప్రదించి పూర్తి వివరాలను తెలుసుకోగలరు. పై సమాచారాన్ని ‘‘సమయం తెలుగు’’ దృవీకరించడం లేదు.Read Latest Religion News and Telugu News