VISHWAMBHARA: త్రిష బర్త్‌డే స్పెషల్.. 'విశ్వంభర' నుంచి లుక్ రివీల్

మెగాస్టార్ చిరంజీవి ప్రస్తుతం యంగ్ డైరెక్టర్ వశిష్టతో 'విశ్వంభర' సినిమా చేస్తున్నారు. ఈ సినిమాలో చాలా ఏళ్ల తర్వాత త్రిష-చిరు జంటగా నటిస్తున్నారు. ఈ భారీ ఫాంటసీ థ్రిల్ల‌ర్‌ ప్రస్తుతం షూటింగ్ దశలో ఉంది. తాజాగా ఈ సినిమా నుంచి ఓ క్రేజీ పోస్టర్ రిలీజ్ చేశారు. ఈరోజు త్రిష పుట్టినరోజు కావడంతో మూవీ టీమ్ స్పెషల్ పోస్టర్ రిలీజ్ చేసి బర్త్‌డే విషెస్ చెప్పింది.

అతిలోకసుందరిలా

త్రిషకి బర్త్‌డే విషెస్ చెబుతూ విశ్వంభర టీమ్ రిలీజ్ చేసిన పోస్టర్‌ వైరల్ అవుతోంది. ఇందులో త్రిష లుక్ అద్భుతంగా ఉంది. చెర్రీ రెడ్ లెహంగాలో మెడలో ధగధగలాడే నెక్లెస్‌తో త్రిష కనిపించింది. ఇక త్రిష బ్యాక్‌ గ్రౌండ్‌లో విశ్వంభరకి సంబంధించిన నక్షత్రం డిజైన్ ఉంది. మొత్తానికి త్రిష లుక్ అయితే చాలా అందంగా ఉందంటూ నెటిజన్లు కామెంట్లు పెడుతున్నారు.

ఈ పుట్టినరోజుతో త్రిష 41వ పడిలోకి అడుగుపెడుతోంది. అయినా సరే వన్నె తరగని త్రిష అందం ఆడియన్స్‌ను కట్టిపడేస్తుంది. 1999లో 'జోడి' సినిమాతో వెండితెరకి పరిచయమైంది త్రిష. ఈ చిత్రంలో సిమ్రాన్ స్నేహితురాలిగా నటించింది. కానీ 2002లో హీరోయిన్‌గా అరంగేట్రం చేసింది. సూర్య నటించిన 'మౌనం పేసియదే' చిత్రం త్రిషకి హీరోయిన్‌గా తొలి సినిమా. ఆ తర్వాత వరుసగా తమిళ సినిమాల్లో యాక్ట్ చేసిన త్రిష 'నీ మనసు నాకు తెలుసు' అనే సినిమాతో తెలుగులో ఎంట్రీ ఇచ్చింది. ఇందులో హీరో తరుణ్‌తో ఆడిపాడింది త్రిష.

ఆ తర్వాత ప్రభాస్‌ నటించిన 'వర్షం'తో బ్లాక్ బస్టర్ హిట్ అందుకుంది. ఇక అక్కడి నుంచి నువ్వొస్తానంటే నేనొద్దంటానా, అతడు, అల్లరి బుల్లోడు, పౌర్ణమి, స్టాలిన్, సైనికుడు, ఆడవారి మాటలకు అర్థాలే వేరులే ఇలా వరుసగా హిట్ సినిమాల్లో యాక్ట్ చేసింది త్రిష. ఇలా దాదాపు రెండు దశాబ్దాలకి పైగా స్టార్ హీరోయిన్ హోదాలో కొనసాగుతోంది త్రిష. ఇక కొత్త అందాల రాకతో ఆ మధ్య త్రిష కెరీర్ కాస్త స్లో అయినప్పటికీ పొన్నియన్ సెల్వన్ సిరీస్‌తో మళ్లీ జోరు అందుకుంది. ఇక గతేడాది చేసి లియో సినిమా కూడా బ్లాక్ బస్టర్ అవ్వడంతో మరోసారి సీనియర్ హీరోల సినిమాల్లో అవకాశాలు సాధిస్తోంది త్రిష. ప్రస్తుతం త్రిష చేతిలో విశ్వంభరతో పాటు కమల్ హాసన్ థగ్ లైఫ్, అజిత్‌తో విడా ముయార్చి, మోహన్ లాల్‌తో రామ్ ప్రాజెక్టులు ఉన్నాయి. ఇలా అటు తమిళ్, ఇటు తెలుగు, కన్నడ, మలయాళంలో మళ్లీ ఫుల్ బిజీ అయిపోయింది ఈ ఎవర్‌గ్రీన్ బ్యూటీ.