కేజ్రీవాల్‌కి మద్దతుగా వాట్సాప్ క్యాంపెయిన్‌, ప్రారంభించిన సునీత కేజ్రీవాల్
AAP WhatsApp Campaign: అరవింద్ కేజ్రీవాల్ భార్య సునీతా కేజ్రీవాల్ వరుస వీడియోలు విడుదల చేస్తూ కార్యకర్తల్లో ధైర్యం నింపే ప్రయత్నం చేస్తున్నారు. ఇప్పటికే రెండుసార్లు మాట్లాడిన ఆమె ఇప్పుడు మరోసారి ఓ వీడియో విడుదల చేశారు. జైల్‌లో ఉన్న కేజ్రీవాల్‌కి ఏమైనా చెప్పాలనుకుంటే వాట్సాప్ నంబర్‌కి మెసేజ్‌ చేయండి అంటూ ఓ నంబర్‌ని వెల్లడించారు. ఆ మెసేజ్‌లన్నింటినీ కేజ్రీవాల్‌కి చేరవేస్తానని హామీ ఇచ్చారు. Kejriwal ko Aashirvaad పేరిట ఈ వాట్సాప్ క్యాంపెయిన్‌ని ప్రారంభిస్తున్నట్టు తెలిపారు. తనకు చాలా మంది ఫోన్ చేసి కేజ్రీవాల్ గురించి ఆరా తీస్తున్నట్టు వెల్లడించారు. అంతే కాదు. కొంత మందైతే కేజ్రీవాల్ త్వరగా విడుదల కావాలని కోరుతూ ఉపవాసం కూడా చేస్తున్నారని చెప్పారు. ఇంత మంది ఆయనపై ప్రేమాభిమానాలు చూపిస్తున్నారని సంతోషం వ్యక్తం చేశారు. అభిమానులందరూ ఏమనుకుంటున్నారో మెసేజ్‌ల ద్వారా చెబితే కచ్చితంగా వాటిని ఆయనకు చేరవేరుస్తానని, ఇవి చదివి ఆయన ఆనందపడతారని అన్నారు. కేవలం ఆప్‌ పార్టీకి మద్దతునిచ్చే వాళ్లే కేజ్రీవాల్ అభిమానులు అయ్యుండాలన్న నిబంధన ఏమీ లేదని స్పష్టం చేశారు.
"కేజ్రీవాల్ కో ఆశీర్వాద్ పేరిట ఇవాళ్టి నుంచి మేము ఓ ప్రచార కార్యక్రమాన్ని ప్రారంభిస్తున్నాం. మీ ఆశీర్వాదాల్ని, మీ ప్రేమని, సందేశాన్ని వాట్సాప్ నంబర్‌కి పంపించండి. మీరు ఏం పంపాలనుకున్నా పంపొచ్చు. వాటిని నేను ఆయనకు చూపిస్తాను. ఇంత మంది ఆయనపై అభిమానం చూపిస్తున్నారంటే కచ్చితంగా సంతోషపడతారు"
- సునీత కేజ్రీవాల్, అరవింద్ కేజ్రీవాల్ భార్య