ప్రపంచంలోనే అత్యంత ధనిక ‘ఖైదీ’.. ఆయన సంపద ఎంతో తెలిస్తే షాకవుతారు?

ఇప్పటి వరకూ ప్రపంచంలో ధనికుల గురించి తెలుసు. మరి ఖైదీల్లోనూ అత్యంత కుబేరులు ఉంటారని తెలుసా? అవును ప్రపంచంలోనే అత్యంత ధనిక ఖైదీ ఉన్నారు. ఆయన ఎవరో కాదు క్రిప్టో కరెన్సీ సంస్థ బినాన్స్‌ వ్యవస్థాపకుడు 47 ఏళ్ల చాంగ్ జావో (Changpeng Zhao). మనీల్యాండరింగ్ తదితర కేసుల్లో ప్రస్తుతం జావో జైలు శిక్ష అనుభవిస్తున్నారు. అమెరికాలో మనీలాండరింగ్‌ నిరోధక, ఆంక్షల చట్టాలను ఉల్లంఘించిన కేసులో గతేడాది అక్కడి న్యాయస్థానం ఆయనను దోషిగా నిర్దారించింది. ఈ కేసులో చాంగ్ జావోకు కనీసం మూడేళ్ల శిక్షను విధించాలని న్యాయవాదులు కోరినా.. ఆయన ప్రవర్తనను కోర్టు పరిగణనలోకి తీసుకుంది.

న్యాయస్థానం ఆదేశాలతో ఆయన నాలుగు నెలలుగా జైల్లో ఉన్నారు. క్రిప్టోకరెన్సీ సంస్థ బినాన్స్‌ను 2017లో స్థాపించిన జావో.. కొన్నేళ్లలోనే కోట్లకు పడగలెత్తాడు. క్రిప్టో ఎక్స్‌ఛేంజ్‌లను నడపుతూ ప్రపంచవ్యాప్తంగా బినాన్స్ కార్యకలాపాలు సాగిస్తోంది. అమెరికా అధికారులతో చేసుకున్న ఒప్పందంలో భాగంగా బినాన్స్‌ సీఈఓ బాధ్యతల నుంచి జావో గతేడాది వైదొలిగారు. అయినప్పటికీ, ఆయనకు సంస్థలో 90 శాతం వాటా ఉండటం గమనార్హం.

బ్లూంబర్గ్ అంచనా ప్రకారం.. జావో సంపద విలువ సుమారు 33 బిలియన్‌ డాలర్లు (భారత కరెన్సీలో సుమారు రూ.3.60 లక్షల కోట్లు). ప్రపంచ మార్కెట్‌లో క్రిప్టో కరెన్సీ కూలిపోవడంతో ఆ సంస్థ నష్టాల్లోకి జారుకుంది. ఈ క్రమంలోనే ప్రభుత్వ ఆంక్షల చట్టాలను జావో ఉల్లంఘించిన విషయం వెలుగులోకి వచ్చింది. అధిక రిస్క్‌తో కూడిన పెట్టుబడుల కోసం కస్టమర్ల నిధుల నుంచి బిలియన్‌ డాలర్లను స్వాహా చేసినట్లు విచారణలో వెల్లడయ్యింది. దీంతో జావోను దోషిగా నిర్దారించిన కోర్టు.. ఆయనకు నాలుగు నెలల జైలు శిక్ష విధించింది. అలాగే, ఆయన 4.3 బిలియన్ డాలర్లు జరిమానా చెల్లించడానికి అంగీకరించారు.

క్రిప్టోకరెన్సీ ఎక్స్ఛేంజ్ ఎఫ్‌టీఎక్స్ సీఈఓ సామ్ బ్యాంక్‌మ్యాన్-ఫ్రైడ్‌ బిలియన్ డాలర్ల మోసానికి పాల్పడినట్టు రుజువైన కొద్ది వారాల తర్వాత జావో మోసం వెలుగులోకి వచ్చింది.

క్రిప్టో కరెన్సీ అనేది డిజిటల్ మనీ.. దీనిని క్రిప్టోగ్రఫీ కరెన్సీ, ఎన్క్రిప్షన్ కరెన్సీ అని కూడా పిలుస్తారు. బ్లాక్‌ చెయిన్‌ టెక్నాలజీలో ఎలక్ట్రానిక్‌గా సృష్టించి, నిల్వ చేసిన డిజిటల్ కరెన్సీ. ఇది ద్రవ్య యూనిట్ల సృష్టిని నియంత్రించడానికి, నిధుల బదిలీని ధృవీకరించడానికి ఎన్క్రిప్షన్ పద్ధతులను ఉపయోగిస్తుంది. దీని విలువ డిమాండ్, సరఫరా ఆధారంగా మారుతూ ఉంటుంది. ఇది ఏ దేశానికీ చెందదు. ఏ నియంత్రణ సంస్థ పరిధిలోకీ రాదు. బిట్ కాయిన్, ఈథర్, డాగీ కాయిన్, ఎథిరియం, బినాన్సు కాయిన్ వంటివి దీని పరిధిలోకి వస్తాయి.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-02T01:40:14Z dg43tfdfdgfd