అమ్మబాబోయ్ అంగన్వాడీ గుడ్డు.. బరువు లేదేంటని పగలగొట్టి చూస్తే షాక్.. అందులో నుంచి..! (వీడియో)

పిల్లలకు పౌష్టికాహారం అందించాలన్న సదుద్ధేశంతో ప్రతి గ్రామంలో అంగన్వాడీల ద్వారా.. కోడుగుడ్లు, పాలు, బాలామృతాన్ని ప్రభుత్వం అందిస్తోంది. అయితే.. మొన్నటి వరకు.. ప్రభుత్వం పంపిణీ చేసే ఈ అంగన్వాడీ కోడిగుడ్లు పక్కదారి పడుతున్నాయన్న వార్తలు వైరల్ అయ్యాయి. చిన్నారులకు చేరాల్సిన గుడ్లు.. కిరాణా దుకాణాల్లో ప్రత్యక్షమయ్యారు. గుడ్ల రేట్లు మండిపోతున్న సమయంలో కిరాణా దుకాణాల్లో తక్కువ ధరలకు అమ్మటంతో.. ఈ విషయం కాస్త వెలుగులోకి వచ్చింది. దీనిపై అధికారులు చర్యలు తీసుకోగా.. ఇప్పుడు అందరూ దారికొచ్చినట్టు కనిపిస్తోంది.

సరఫరాలో ఎలాంటి లోపం ఉండటం లేదు కానీ.. ఆ సరఫరా చేసే గుడ్లలోనే అతిపెద్ద లోపం కనిపిస్తోంది. జగిత్యాల జిల్లా కోరుట్ల పట్టణంలో జరిగిన ఓ ఘటన.. అందరినీ విస్తుపోయేలా చేస్తోంది. పట్టణంలోని రథాలపంపుకు చెందిన ఆకుల మన్విత అనే చిన్నారికి.. స్థానిక అంగన్వాడీ టీచర్ కోడిగుడ్లను అందజేసింది. అయితే... ఆదివారం రోజున మన్వితకు.. కోడిగుడ్డు ఉడబెట్టి ఇద్దామని ఆమె తల్లి ఓ గుడ్డు తీసుకుంది. అయితే.. తన చేతికి వచ్చిన గుడ్డు అన్నింటిలా కాకుండా కొంత తేలికగా ఉండటం గమనించింది. అందులోనూ.. ఆ గుడ్డు ఏదో తేడా ఉందన్న అనుమానం వచ్చింది.

వెంటనే గుడ్డు పెంకును తొలిచి చూడగా.. ఒక్కసారిగా దుర్వాసన విడుదలైంది. అంతే కాదండోయ్.. గుడ్డు లోపల కోడిపిల్ల కదులుతున్నట్టుగా కనిపించటంతో.. మన్విత తల్లిదండ్రులు ఒక్కసారిగా అవాక్కయ్యారు. ఈ విషయాన్ని స్థానికులకు తెలిపారు. దీంతో.. ఈ వీడియో సోషల్ మీడియాలో వైరల్ అయ్యింది. ఈ వ్యవహారంపై అధికారులు స్పందించారు.

ఈ ఘటనపై విచారించిన సీపీడీవో తిరుమలా దేవి.. గొల్లవాడ అంగన్వాడీ కేంద్రాన్ని పరిశీలించారు. అయితే.. జూన్ 8వ తేదీనే లబ్దిదారులకు గుడ్లు పంపిణీ చేసినట్టు తేలగా.. ఆ గుడ్లను జూన్ 30న వాడినట్టు తెలిపారు. ఎక్కువ రోజులు కావటంతో ఆ గుడ్డు కుల్లిపోయిందని.. అందులో కోడి పిల్ల లేదని వివరణ ఇచ్చారు. ఏ గుడ్డునైనా కేవలం 15 రోజుల లోపే వాడాలని అధికారులు సూచిస్తున్నారు. ఎక్కువ కాలం నిలువ ఉంచితే పాడైపోతాయని.. అలాంటివి తింటే.. ఆరోగ్యానికి ప్రమాదమని వివరిస్తున్నారు.

ఏది ఎలా ఉన్నా.. ఈ వీడియో చూసిన తర్వాత.. పిల్లలకు అంగన్వాడీ గుడ్లు పెట్టేందుకు తల్లిదండ్రులు ఆలోచిస్తున్నారు. గుడ్డులో నుంచి కోడిపిల్ల బయటకు రావడం చూసిన.. పిల్లలు సాధారణ గుడ్లు కూడా తినడానికి భయపడుతున్నారు. మరోవైపు.. గర్భిణీలు కూడా గుడ్లు తినాలంటే ఆలోచించాల్సిన పరిస్థితి ఏర్పడింది.

గతంలో కూడా.. గుడ్ల విషయంలో పలు వీడియోలో నెట్టింట వైరల్ అయ్యాయి. అంగన్వాడీలో ఇచ్చిన గుడ్లను నీళ్లలో వేసి చూస్తే.. చాలా వరకు గుడ్లు పైకి తేలుతున్నాయని.. వాటిని పగలగొట్టి చూస్తే.. లోపలి నుంచి గడ్డలు గడ్డలుగా నీలం పడటం, అందులో నల్లని పదార్ధాలు ఉన్నట్టు గమనించినట్టుగా వీడియోలు బయటకు వచ్చాయి. మరోవైపు.. అంగన్వాడీల్లో తాజా గుడ్లు ఇవ్వకుండా.. స్టోర్ చేసిన గుడ్లు సరఫరా చేస్తున్నట్టుగా ప్రజలు ఆరోపిస్తున్నారు. పిల్లలు, గర్బిణీల ఆరోగ్యాలతో ఆడుకుంటారా అని ప్రశ్నిస్తున్నారు. నాణ్యమైన ఆహారం అందించాలని డిమాండ్ చేస్తున్నారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-03T14:52:55Z dg43tfdfdgfd