ప్రియురాలి కళ్లలో ఆనందం కోసం.. హోంగార్డు అయ్యుండి, కొంచెం కూడా సిగ్గు లేకుండా..!

చుక్కలన్నింటిని పోగేసి చీరగా చుట్టేయనా.. నెలవంకను తీసుకొచ్చి సిగలో తురిమేయనా.. అంటూ ప్రియురాలి కోసం సినిమాల్లో ప్రియుడు పాడుతుంటే అబ్బో అనుకుంటాం. అయితే.. నిజంగా కూడా చాలా మంది ప్రేమికులు.. తమ ప్రియురాళ్ల కోసం ఎన్నెన్నో చేస్తుంటారు. తమ ప్రియురాలు అడగాలే కానీ.. కొండ మీద కోతిని తీసుకురావటం కాదు.. తానే ఆ కోతిలా మారిపోయి రోడ్డుపై కుప్పి గంతులు కూడా వేస్తాడు. ఆ ప్రియురాలి కళ్లల్లో ఆనందం కోసం.. డ్రెస్సుల దగ్గరి నుంచి ఐఫోన్ల వరకు.. పానీ పూరీ నుంచి బిర్యానీ పార్శిళ్ల వరకు ఏదడిగినా కాదనకుండా లేదనకుండా సమకూర్చుతుంటారు. అలాగే.. తన ప్రియురాలి కోసం ఓ హోంగార్డు కూడా అలాంటి పనులే చేశాడు. కానీ.. ఆ పనులన్ని చేయడానికి కావాల్సిన డబ్బు కోసం మాత్రం ఓ దొంగలా మారిపోయాడు. దొంగ.. సాదాసీదా దొంగ కాదండోయ్.. ఏకంగా 36 కేసుల్లో కీలక నిందితుడిగా ఉన్నాడంటే పరిస్థితి అర్థం చేసుకోవచ్చు.

రాజస్థాన్‌కు చెందిన మహేందర్ సింగ్ సైబరాబాద్ కమిషనరేట్‌ పరిధిలో హోంగార్డ్‌గా పనిచేశాడు. అతనికి అప్పటికే పెళ్లవగా.. మరో మహిళతో వివాహేతర సంబంధం ఏర్పడింది. ఆమెతో జల్సాలు చేసుకుంటూ.. కొన్ని రోజులు బాగానే గడిపాడు. కొన్ని రోజులకు ఆ జల్సాలు చేసేందుకు, తన ప్రియురాలి ఆనందంగా ఉంచేందుకు.. తన జీతం సరిపోక అడ్డదారి తొక్కాడు.

హోంగార్డు కావటంతో.. దొంగతనాల్లో ఉన్న చిన్న చిన్న లొసుగులు తెలియటంతో.. తన జల్సాలకు డబ్బు సమకూర్చుకునేందుకు అదే దారి ఎంచుకున్నాడు మహేందర్ సింగ్. 2012 నుంచి 2015 వరకు వరుసగా చైన్ స్నాచింగ్‌కు పాల్పడ్డాడు. ఇప్పటివరకు మహేందర్ సింగ్ మీద.. బాచుపల్లి, కేపీహెచ్‌బీ, సనత్ నగర్, బాలానగర్ పోలీస్ స్టేషన్ల పరిధిలో 36 కేసులు నమోదు అయ్యాయి. దీంతో మహేందర్ సింగ్ పై పీడీ యాక్ట్ కూడా ప్రయోగించారు పోలీసులు.

అయితే.. పోలీసులు పీడీ యాక్ట్ పెట్టినా మహేందర్ సింగ్‌లో మాత్రం ఎలాంటి మార్పు లేదు. దొంగతనాలు, చైన్ స్నాచింగ్‌లు కంటిన్యూ చేస్తూనే ఉన్నాడు. తాజాగా.. జూన్ 24వ తేదీన బాచుపల్లిలో వాకింగ్ చేస్తున్న ఓ మహిళ మెడలో నుంచి గోల్డ్ చైన్‌ కొట్టేశాడు. అక్కడితో ఆగకుండా.. జీడిమెట్ల, జగద్గిరిగుట్టలో కూడా మరో ఇద్దరి మహిళల దగ్గరి నుంచి బంగారు గొలుసులను అపహరించాడు. ఈ కేసుల్లో దర్యాప్తు చేపట్టిన పోలీసులు.. మహేందర్ సింగ్‌ను పట్టుకున్నారు. మహేందర్ సింగ్‌ను అరెస్ట్ చేసిన పోలీసులు.. అతని దగ్గరి నుంచి 5 లక్షలు విలువ చేసే బంగారంతో పాటు ఒక బైక్‌ను స్వాధీనం చేసుకున్నారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-03T17:23:16Z dg43tfdfdgfd