PRABHAS MANIA : 4 సినిమాలు, 500 కోట్లకు పైగా వసూళ్లు - టాలీవుడ్ రెబల్ స్టార్ సరికొత్త రికార్డు
Prabhas 500 Crore Record Globally : ప్రభాస్. ఈ పేరు ప్రస్తుతం దేశ వ్యాప్తంగా మార్మోగుతున్నది. ‘బాహుబలి’ సినిమాతో పాన్ ఇండియన్ స్టార్ గా మారిన ఆయన.. తాజాగా ‘కల్కి 2898 ఏడీ’ సినిమాతో మరో లెవల్ కు చేరారు. ఇండియన్ ఫిల్మ్ హిస్టరీలో ప్రభాస్ సరికొత్త రికార్డులను సృష్టిస్తున్నారు. ఇప్పటి వరకు ఆయన నటించిన 4 సినిమాలు ఏకంగా రూ. 500 కోట్లకు పైగా వసూళ్లతో దుమ్మురేపాయి. ఇండస్ట్రీలో ఇప్పటి వరకు ఏ హీరోకు సాధ్యంకాని ఫీట్ ను ఆయన చేసి చూపించారు.
రూ. 500 కోట్లు వసూలు చేసిన ప్రభాస్ చిత్రాలు
1.బాహుబలి 2
దర్శకధీరుడు తెరకెక్కించిన విజువల్ వండర్ ‘బాహుబలి : ది కన్‌క్లూజన్’. ఈ మూవీలో ప్రభాస్ హీరోగా అనుష్క, రానా ప్రధాన పాత్రల్లో నటించించారు. రమ్యకృష్ణ, సత్యరాజ్, సుదీప్ కీలక పాత్రలు పోషించారు. రూ. 250 కోట్ల బడ్జెట్ తో తెరకెక్కిన ఈ సినిమా ప్రపంచ వ్యాప్తంగా రూ. 1814 కోట్ల గ్రాస్ వసూళు చేసింది. రూ. 821 కోట్ల షేర్ సాధించింది. విడుదలకు ముందే ‘బాహుబలి 2’ రూ. 350 కోట్ల ప్రీ రిలీజ్ బిజినెస్ చేసింది.
2.బాహుబలి
‘బాహుబలి’ సినిమాతో తెలుగు సినిమా సత్తాను ప్రపంచానికి చాటి చెప్పారు దర్శకధీరుడు రాజమౌళి. ఇండియన్ ఫిల్మ్ హిస్టరీలోనే గతంలో ఎన్నడూ చూడనటువంటి అద్భుత సినిమాను తెరపై ఆవిష్కరించారు. ఈ సినిమాను చూసి హాలీవుడ్ ప్రముఖులు సైతం అద్భుతం అంటూ ప్రశంసలతో ముంచెత్తారు. రూ. 180 కోట్ల బడ్జెట్ తో తెరకెక్కిన ఈ సినిమా ప్రపంచ వ్యాప్తంగా రూ. 632 కోట్ల గ్రాస్ వసూలు చేసింది. ప్రపంచ వ్యాప్తంగా రూ. 312 కోట్ల షేర్ సాధించింది. ఈ మూవీ విడుదలకు ముందే రూ. 118 కోట్ల బిజినెస్ చేసింది. ఇండియన్ ఫిల్మ్ హిస్టరీలో అప్పటి వరకు ఉన్న రికార్డులను ఈ సినిమా బద్దలు కొట్టింది.
3. సలార్
ప్రభాస్ హీరోగా ప్రశాంత్ నీల్ దర్శకత్వం తెరకెక్కిన పాన్ ఇండియన్ మూవీ ‘సలార్’. శృతిహాసన్ హీరోయిన్ గా పృథ్వీరాజ్ సుకుమారన్ ప్రధాన పాత్రలో ఈ సినిమా రూపొందింది. ‘కేజీఎఫ్’ తర్వాత ప్రశాంత్ దర్శకత్వం వహించిన ఈ సినిమాపై భారీ అంచనాలు ఏర్పడ్డాయి. అంచనాలకు అనుగుణంగానే వసూళ్ల పరంగానూ ఈ సినిమా సరికొత్త రికార్డులు నెలకొల్పింది. రూ. 300 కోట్లతో తెరకెక్కిన ఈ సినిమా ప్రపంచ వ్యాప్తంగా రూ. 623.5 కోట్ల గ్రాస్ సాధించింది. రూ. 336.2 కోట్ల షేర్ వసూళు చేసింది. ఈ సినిమా విడుదలకు ముందే రూ. 335 కోట్ల బిజినెస్ సాధించింది.
4.‘కల్కి 2898 ఏడీ’
ప్రభాస్ హీరోగా, నాగ్ అశ్విన్ సృష్టించిన మరో ప్రపంచం ‘కల్కి 2898 ఏడీ’. అమితాబ్ బచ్చన్, కమల్ హాసన్, దీపికా పదుకొణె, దిశాపటానీ కీలక పాత్రలు పోషించిన ఈ సినిమా ప్రేక్షకులను మెస్మరైజ్ చేస్తోంది. హాలీవుడ్ ‘అవతార్’ రేంజిలో తెరకెక్కిన ఈ సినిమా వసూళ్ల పరంగానూ రికార్డుల మోత మోగిస్తోంది. రూ. 600 బడ్జెట్ తో తెరకెక్కిన ఈ సినిమా విడుదలకు ముందే రూ. 380 కోట్లు సాధించింది. నాలుగు రోజుల్లో ప్రపంచ వ్యాప్తంగా ఏకంగా రూ. 555 కోట్లు సాధించింది.
2024-07-01T08:36:49Z dg43tfdfdgfd
