KRISHNA MUKUNDA MURARI TODAY: మీరా బెడ్ మీద సాక్ష్యం! ‘ఆస్తి మొత్తం ఆదర్శ్‌కి’.. కృష్ణ, మురారీ బయటికి!!

Krishna Mukunda Murari Today Episode: ముకుంద మీరాగా అడుగుపెట్టిన క్షణం నుంచి.. ముకుంద తీరు.. ఉత్కంఠగా మారింది. ముకుందగా ఉన్నప్పుడు.. భర్తకు మందు పోసిన ముకుంద.. ఇప్పుడు మీరాగా మారాక కూడా తనవైపు తిప్పుకోవడానికి ఆదర్శ్‌కి మందుపోతుంది. అసలేం జరిగిందో ఇప్పుడు చూద్దాం. (photo courtesy by star maa and disney+ hotstar)

Krishna Mukunda Murari March 29 Episode: ట్విస్ట్‌ల మీద ట్విస్ట్‌లతో సాగుతోంది కృష్ణ, ముకుంద, మురారీల కథ. ఓ వైపు మీరాగా మారిపోయిన ముకుంద.. ఇంట్లో అందరినీ తన రూపంతోనే మోసం చేస్తోంది. ఓ అనాథగా నటిస్తూ.. జీవిస్తోంది. ఈ క్రమంలోనే నేేటి కథనంలో ఓ ఉత్కంఠభరితమైన సీన్ ఎదురైంది. ఇక కమింగ్ అప్‌లో ఆదర్శ్ ఇచ్చిన జలక్‌కి అంతా బిత్తరపోయారు. ఓ వైపు ఆదర్శ్ ఆవేశం కోపం.. మరోవైపు మురారీ, కృష్ణల ఆవేదనలు.. నడుము.. ముకుంద ఆడబోయే ఆట ఉత్కంఠగా మారిపోయింది. అసలే ఏం జరిగింది అంటే.. ఒకరి తర్వాత ఒకరు అంతా తినడానికి వస్తారు. భవానీ దేవి వచ్చి.. ఆదర్శ్ ఎక్కడా? అంటుంది. ‘వాడు ఇప్పుడు ఎందుకులే అమ్మా.. ఏదొక గొడవ మళ్లీ’అంటుంది నందు కంగారుగా. ‘ఏం.. వాడు తినడా?’ అంటుంది భవానీ దేవి. ‘వాడు ఉదయాన్నే టిఫెన్ కూడా తినలేదు’ అంటుంది రేవతి. ‘అయ్యో అదేంటీ?’ అంటుంది భవానీ దేవి. ‘ఏం చెప్పమంటావ్ అక్కా? వాడ్ని ఒకలాగా నా కొడుకు మురారీని ఒకలాగా చూస్తున్నానట.. నిందలు వేసి వెళ్లిపోయాడు’ అంటుంది రేవతి బాధగా. మీరాని తీసుకొస్తానంటూ కృష్ణ పరుగులు..

‘అలా అని ఆదర్శ్‌ని అలానే వదిలేస్తామా.. కనీసం పద్దతి మార్చుకోమని చెప్పాలి కదా.. మధు వెళ్లి వాడ్ని పిలుచుకునిరా’ అంటుంది భవానీ దేవి. సరే పెద్దమ్మా అంటూ మధు వెళ్తాడు. ఇక వెంటనే.. ‘అవును మీరా ఎక్కడా?’ అంటుంది భవానీ దేవి. ‘నేను వెళ్లి తీసుకొస్తాను పెద్ద అత్తయ్యా’ అంటూ కృష్ణ మీరా గదికి నడుస్తుంది కంగారుగా. అప్పటికే ముకుంద అలియాస్ మీరా.. మురారీ షర్ట్‌ని దొంగచాటుగా తన గదిలోకి తెచ్చుకుని.. దాన్ని చూసుకుని మురిసిపోతూ ఉంటుంది. అయితే అలా చూసుకోగా చూసుకోగా మురారీ కనిపిస్తాడు ఆ షర్ట్‌లో.

మురారీ షర్ట్‌తో ఊహలు..

ఇక మురారీని చూసి ముకుంద పొంగిపోతుంది. వచ్చేశావా మురారీ.. చూశానా నీ కోసం రూపం మార్చుకుని నేను వచ్చేశాను. నీ సొంతం కావడానికి. నువ్వు నా సొంతం ఎప్పుడవుతావ్...’ అంటూ తనలో తానే షర్ట్‌తో మాట్లాడుకుంటూ ఉంటుంది. ఇక కృష్ణ గుమ్మం దాకా వచ్చేసరికి.. ఆ అలికిడికి.. మీరా బెదిరిపోయి.. వెంనటే ఆ షర్ట్‌ని లుంగచుట్టి.. మంచం మీద పెట్టేస్తుంది. దానిపైన పిల్లో వేసేస్తుంది. కృష్ణకు కనిపించకుండా. ‘మీరా.. ఏం చేస్తున్నావ్.. భోజనానికి రమ్మంటోంది పెద్ద అత్తయ్య.. ఎందుకు అదోలా ఉన్నావ్’ అంటుంది కృష్ణ.

సాక్ష్యం దాచిపెట్టిన ముకుంద..

‘ఎక్కడో ఉండాల్సిన నేను ఈ రోజు ఇక్కడున్నాను అదే ఆలోచిస్తున్నా కృష్ణ’ అంటూ డ్రామా ప్లే చేస్తుంది మీరా అలియాస్ ముకుంద. ‘నువ్వు అలాంటి ఆలోచనలేం పెట్టుకోకు.. నువ్వు రావాల్సిన చోటికే వచ్చావ్.. రా వెళ్దాం భోజనానికి’ అంటుంది కృష్ణ ప్రేమగా. ‘నువ్వు పదా కృష్ణా నేను వచ్చేస్తాను’ అంటూ మీరా.. కృష్ణను పంపించేస్తుంది. మురారీ షర్ట్‌(సాక్ష్యం)ని దాని పెట్టేస్తుంది ముకుంద. మనసులో మాత్రం .. ‘నువ్వు అన్నది నిజమే కృష్ణా.. నేను రావాల్సిన చోటికే వచ్చాను.. నిన్నే పంపాల్సిన చోటికి పంపేస్తా’ అనుకుంటుంది మనసులో.

చాటుగా వినేసిన ముకుంద..

ఇక మరోవైపు ఆదర్శ్ వచ్చి.. ‘ఏంటి పెద్దమ్మా పిలిచావట?’ అంటాడు. ‘భోజనం చేద్దాం కూర్చో’అంటుంది కోపంగా. ‘నాకు తినాలన్న మనసు రావడం లేదు.. ఈ ఇంట్లో ఉంటున్నవాళ్లు నచ్చడం లేదు..’ అంటాడు ఆదర్శ్. ‘అంతగా నచ్చకుంటే వెళ్లిపోతాం’ అంటాడు మురారీ, కృష్ణలు. నేను అనేది మీరా గురించి అంటాడు ఆదర్శ్. అప్పుడే మెట్లు దిగబోతున్న మీరా(ముకుంద) ఆ మాటలు వినేస్తుంది. ‘అంటే నా అనుమానం కరెక్టే అని మాట. ఆదర్శ్ నా మీద కోపంగా ఉన్నది మురారీని విడిపించినందుకే. అయితే ముందు ఆదర్శ్ మనసు నా వైపు తిరిగేలా చేసుకోవాలి’ అని ఫిక్స్ అవుతుంది.

ఎమోషనల్ డ్రామా స్టార్ట్స్

‘అర్హత లేని వాళ్లు ఈ ఇంట్లో ఉండలేరు ముకుందలా.. మీరా మంచి అమ్మాయి. తను ఇక్కడే ఉంటుంది’అంటుంది భవానీ దేవి. ‘అందరి కంటే ఎక్కువ అర్హత నాకే ఉంది అత్తయ్యా.. అందుకే నేను వచ్చేశాను’ అనుకుంటుంది ముకుంద మనసులో. ‘ఇక చాలు.. తినడానికి కూర్చో’ అని ఆదర్శ్‌ని బెదిరించి మరీ కూర్చోబెడుతుంది భవానీ దేవి. ఇక అప్పుడే మీరా మెట్లు దిగి.. ఎమోషనల్ డ్రామా ప్లే చేస్తుంది. ‘నేను అనాథని.. నాకు ఇంత పెద్ద కుటుంబాన్ని చూస్తే ఆనందబాష్పాలు వస్తున్నాయి మేడమ్.. అందరికీ నేను వడ్డిస్తాను’ అంటూ కాకా పట్టి మరీ వడ్డిస్తుంది.

మీరాతో ఏకమైన ఆదర్శ్..

అయితే ఆదర్శ్‌కి అది ఏమాత్రం నచ్చదు. వడ్డించిన తర్వాత.. మీరాని కృష్ణ కూర్చుని తినమంటుంది. అలా కూర్చునేటప్పుడు ముకుంద ఫొటోకి దండ వేసి ఉండటం చూసిన మీరా.. రగిలిపోతూ.. ‘దీన్ని ఎలాగైనా తీయించెయ్యాలి’అనుకుంటుంది మనసులో. ‘నాకు ముకుంద అంటే చాలా ఇష్టం. కానీ తన ఫొటో చూస్తుంటే తను రైలు కింద పడి చనిపోవడమే గుర్తొస్తుంది. ప్లీజ్ మీరు ఏం అనుకోకపోతే.. ఆ ఫొటో తీసేస్తారా ప్లీజ్.. మీకు ఇబ్బంది అయితే వద్దు’ అంటుంది మీరా. ‘నువ్వు చెప్పిన వాటిలో ఇది నాకు కూడా నచ్చింది. అయినా బాధను పెంచే ఆ ఫొటో అక్కడ ఉండటం నాకు కూడా ఇష్టం లేదు’ అంటాడు ఆదర్శ్.

ఆదర్శ్‌ని తనవైపు తిప్పుకుని..

దాంతో భవానీ దేవి.. ‘అయితే తీసెయ్‌రా ఆ ఫొటోని నువ్వే’ అంటుంది. కమింగ్ అప్‌లో.. ఆదర్శ్‌కి బాగా మందు పోసి మచ్చిక చేసుకునేపనిలో పడుతుంది మీరా(ముకుంద). అప్పుడే.. ఆదర్శ్ వేగంగా వేగంగా తాగుతుంటే.. ‘ఎందుకంత తొందర సార్.. నిదానంగా తాగండి.. ఇది మీ ఇల్లే కదా?’ అంటుంది. ‘లేదు.. కాదు.. అంతా నాది అనుకుని భ్రమలో ఉండటమే ఏది నాది కాదు’ అంటాడు ఆదర్శ్ తూలిపోతూ. సీన్ కట్ చేస్తే.. తాగి ఇంట్లో అందరి ముందు గొడవ చేస్తూ ఉంటాడు ఆదర్శ్. మీరా కూడా అక్కడే ఉంటుంది. ‘ఏంట్రా ఈ గొడవ?’ అంటూ వస్తుంది భవానీ దేవి.

ఆస్తి మొత్తం ఆదర్శ్ పేరున?

‘ఈ ఇంట్లో నాకు విలువే లేదమ్మా.. నేను నీ కొడుకుగా గుర్తింపు లేదు’అంటాడు ఆదర్శ్ తూలిపోతూ తల్లితో. ‘ఏం చేస్తే నీకు విలువ ఇస్తున్నమన్న సంగతి తెలుస్తుంది?’ అంటుంది భవానీ దేవి. ‘మొత్తం ఆస్తి నా పేరు మీద రాసెయ్.. అప్పుడే ఈ ఇంట్లో ఎవరు ఉండాలో ఎవరు ఉండకూడదో నిర్ణయిస్తాను’ అంటాడు ఆదర్శ్ ఊగిపోతూ. షాక్ అవుతారు అక్కడున్నవారంతా. నిజంగానే భవానీ దేవి.. కొడుకు కోరికను తీరుస్తుందా? అదే జరిగితే మురారీ, కృష్ణలను బయటికి గెంటేస్తాడా? అనేది ఉత్కంఠగా మారింది. నిజానికి మీరా ప్లాన్ అది కాదు. మురారీ ఉండాలి కృష్ణ బయటికి పోవాలి అనేది ఆమె ఎత్తుగడ. ఏం జరుగుతుందో చూద్దాం.