SPIDERMAN: స్పైడర్‌మ్యాన్, స్పైడర్‌ఉమెన్‌లపై కేసు పెట్టిన పోలీసులు.. ఇంతకీ ఏం చేశారంటే?

Spiderman: కొందరు తాము ఫేమస్ కావడానికి రకరకాల ప్రయత్నాలు చేస్తూ ఉంటారు. ఇక ప్రస్తుత కాలంలో సోషల్ మీడియా వచ్చిన తర్వాత.. ఓవర్‌నైట్‌ స్టార్లుగా ఎంతో మంది పుట్టుకొచ్చారు. ఒక్క వీడియో క్లిక్ అయితే చాలు.. ఫాలోవర్లు పెరిగిపోతూ ఉంటారు. ఇలా ఫాలోవర్లను పెంచుకునేందుకు సోషల్ మీడియా ఇన్‌ఫ్లూయెన్సర్లు రకరకాల తంటాలు పడుతూ ఉంటారు. ఇంకా కొన్ని సార్లు అయితే ప్రమాదకరమైన స్టంట్లు చేసి గాయాలపాలు కావడం.. ఒక్కోసారి ప్రాణాలు కోల్పోయిన సంఘటనలు కూడా ఉన్నాయి. ఈ క్రమంలోనే ఇద్దరు యువతీ యువకులు.. స్పైడర్‌మ్యాన్ డ్రెస్‌లు వేసుకుని రోడ్లపైకి రాగా.. అది గుర్తించిన పోలీసులు వారిపై కేసులు పెట్టారు. అయితే వారు బైక్‌పై డేంజర్ స్టంట్లు చేయడమే కాకుండా ట్రాఫిక్ నియమాలను ఏ మాత్రం పాటించలేదని గుర్తించారు. దీంతో వారిపై కేసు నమోదు చేశారు.

ఈ సంఘటన దేశ రాజధాని ఢిల్లీలో జరిగింది. నజఫ్‌గఢ్‌కు చెందిన 20 ఏళ్ల ఆదిత్య.. 19 ఏళ్ల అంజలి స్పైడర్‌మ్యాన్, స్పైడర్ఉమెన్ కాస్ట్యూమ్స్ వేసుకుని.. శుక్రవారం పోలీసులకు దొరికిపోయారు. అయితే ఢిల్లీలోని పలు ప్రాంతాల్లో రోడ్లపై బైక్‌తో ప్రమాదకరమైన స్టంట్లు చేస్తూ రీల్స్ కోసం నానా హంగామా సృష్టించారు. అంతేకాకుండా వీడియోలు తీస్తూ అర్బన్ ఎక్స్‌టెన్షన్ రోడ్-IIలో వెళ్లే ఇతర వాహనదారులకు తీవ్ర ఇబ్బందులు కలిగించారు. దీంతో రంగంలోకి దిగిన ఢిల్లీ పోలీసులు ఎట్టకేలకు ఆదిత్య, అంజలిలను పట్టుకున్నారు. అనంతరం వారిపై కేసు నమోదు చేశారు.

అయితే బైక్‌పై వెళ్తున్న ఆదిత్య, అంజలి.. స్టంట్లతోపాటు ట్రాఫిక్ నిబంధనలను కూడా ఉల్లంఘించినట్లు పోలీసులు తెలిపారు. హెల్మెట్ లేకుండా డ్రైవింగ్ చేయడం, సైడ్ మిర్రర్స్ లేవని.. ఇక ఆదిత్యకు లైసెన్స్ కూడా లేదని గుర్తించారు. అంతేకాకుండా.. ప్రమాదకరమైన డ్రైవింగ్, నంబర్ ప్లేట్ లేకుండా బండిని నడపటం వంటి నేరాలకు సంబంధించి సెక్షన్లపై వారిపై కేసు నమోదు చేసినట్లు ఢిల్లీ సీనియర్ పోలీస్ అధికారి ఒకరు తెలిపారు.

ఆదిత్య, అంజలి బైక్‌పై వెళ్తూనే రీల్స్ చేశారు. ట్రాఫిక్ నిబంధనలను పట్టించుకోకుండా చేతులు వదిలేసి డ్రైవింగ్ చేస్తూ.. టైటానిక్ సినిమాలో హీరోహీరోయిన్ల లాగా ఫోటోలకు ఫోజులు ఇచ్చారు. ఈ వీడియో వైరల్ కావడంతో పోలీసులకు సమాచారం అందింది. దీంతో వారు గాలింపు చేపట్టి స్పైడర్‌మ్యాన్, స్పైడర్ఉమెన్‌లపై కేసు నమోదు చేశారు. ఆదిత్య గతంలో కూడా ఇలాంటి వేషధారణతో బహిరంగ ప్రదేశాల్లో రీల్స్ చేశాడు. ఇండియన్ స్పైడీ అఫీషియల్ అనే ఇన్‌స్టాగ్రామ్ ఖాతాలో ఇలాంటి వీడియోలను పోస్ట్ చేస్తుంటాడు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-26T11:27:48Z dg43tfdfdgfd